चिखलीकरांना शुद्ध व मुबलक पाणी देण्यासाठी वचनबद्ध!

लिकेजमुक्त जलवाहिनीमुळे पाणीपुरवठ्यात मोठी वाढ: आ. श्वेताताई महाले पाटील 

चिखली (MLA Shweta Mahale Patil) : चिखली विधानसभा मतदारसंघाचे आमदार श्वेता ताई महाले पाटील यांनी 24 मे रोजी शहरातील नगर परिषद अंतर्गत पाणी पुरवठा करणाऱ्या फिल्टर प्लांटची पाहणी करून नागरिकांना मिळणाऱ्या पाण्याच्या पुरवठ्याबाबत सविस्तर आढावा घेतला. शहरातील प्रत्येक नागरिकाला शुद्ध आणि पुरेसे पाणी मिळावे, यासाठी सुरू असलेल्या कामांची माहिती घेत संबंधित अधिकारी व कर्मचाऱ्यांशी चर्चा केली तसेच आवश्यक त्या सूचना दिल्या.

चिखली शहराला पाणीपुरवठा करणाऱ्या पेनटाकळी धरणावरून येणाऱ्या मुख्य पाईपलाईनवर तब्बल १३ ठिकाणी लिकेज होते. नगर परिषद अधिकारी, कर्मचारी, पाणी पुरवठा सभापती व सर्व नगरसेवकांनी मेहनत घेऊन ही सर्व लिकेज बंद केली. पूर्वी या लाईनमधून ७० लाख लिटर पाणीपुरवठा होत होता. आता लिकेज बंद झाल्यानंतर तब्बल ९० लाख लिटर पाणी उपलब्ध होत असून फिल्टर प्रक्रियेनंतर नागरिकांना वेळेवर पाणीपुरवठा होणार आहे.

चिखली शहरातील नागरिकांना दरडोई व शुद्ध पाणी मिळावे यासाठी सर्व लोकप्रतिनिधी तत्पर आहेत. सध्या सुरू असलेली अमृत वाढीव पाणी पुरवठा योजना लवकर पूर्ण करून नागरिकांना दररोज पाणी उपलब्ध करून देण्याचा आमचा प्रयत्न आहे. अशी माहिती आमदार श्वेताताई महाले पाटील (MLA Shweta Mahale Patil) यांनी दिली

यावेळी नगराध्यक्ष  पंडितदादा देशमुख, रामदासभाऊ देव्हडे, शहराध्यक्ष तथा नगरसेवक सागर पुरोहित, पाणी पुरवठा सभापती दत्ता सुसर, बांधकाम सभापती सुहास शेटे, कपिल खेडेकर, नगरसेवक दीपक वाधवाणी, दीपक खरात, सुरेंद्र ठाकूर, राम बनसोडे, गटनेते अमोल खबूतरे, बाळू जाधव, चेतन देशमुख, सिद्धेश्वर ठेंग यांच्यासह पाणी पुरवठा विभागाचे अधिकारी उपस्थित होते.