मुख्यमंत्री सहायता निधीत एक लाखांची मदत; वाढदिवसानिमित्त मुख्याधिकाऱ्यांची सामाजिक बांधिलकी

चिखली (Chief Officer Prashant Bidkar) : चिखली नगरपरिषदेचे मुख्याधिकारी प्रशांत बिडकर यांनी आपल्या वाढदिवसाचे औचित्य साधून सामाजिक बांधिलकी जपत मुख्यमंत्री सहायता निधीत १ लाख रुपयांची मदत जमा केली. विशेषतः संकटग्रस्त शेतकरी बांधवांसाठी या मदतीचा उपयोग व्हावा, या भावनेतून त्यांनी सामाजिक उत्तरदायित्वाचे भान जपत हा उपक्रम राबविला. शेतकरी विविध नैसर्गिक संकटांना सामोरे जात असताना त्यांच्या अडचणींची जाणीव ठेवून वाढदिवसाचा अनावश्यक खर्च टाळत समाजोपयोगी कार्यासाठी योगदान देण्याचा निर्णय प्रशांत बिडकर यांनी घेतला. मुख्यमंत्री सहायता निधीत जमा करण्यात आलेली ही मदत गरजूंसाठी उपयोगी ठरणार असून, त्यांच्या या उपक्रमाचे सर्व स्तरांतून कौतुक होत आहे.

वाढदिवस केवळ उत्सवापुरता मर्यादित न ठेवता सामाजिक बांधिलकी आणि माणुसकीची जाणीव जपत गरजूंसाठी मदतीचा हात पुढे करण्याची भूमिका प्रशांत बिडकर यांनी घेतली. त्यांच्या या उपक्रमातून सामाजिक उत्तरदायित्वाचा सकारात्मक संदेश देण्यात आला आहे.

यावेळी त्यांच्या हितचिंतकांनी आणि नागरिकांनी वाढदिवसानिमित्त शुभेच्छा देताना, “शेतकऱ्यांसाठी असलेले आपले योगदान अमूल्य आहे,” अशा भावना व्यक्त केल्या. समाजाच्या अडचणीच्या काळात प्रशासनातील जबाबदार अधिकारी म्हणून संवेदनशीलतेने पुढाकार घेण्याच्या या उपक्रमाचे विशेष कौतुक होत आहे.