आजे़गाव येथील तरुणाचा पिकअप अपघातात जागीच मृत्यू

आजेगाव (Ajegaon pickup accident) : सेनगाव तालुक्यातील आजेगाव येथील रहिवासी कृष्णा गजानन हलगे (३०) याचा शनिवारी रात्री झालेल्या भीषण अपघातात जागीच मृत्यू झाला. कृष्णा सेनगाव येथे दुकानाचे कामकाज आटोपून रात्री आठच्या सुमारास मोटर सायकलवरून आजेगावकडे परत येत होता. साखरखंड गाव ओलांडल्यानंतर उतारावर समोरून येणाऱ्या पिकअप वाहनाची व त्याच्या मोटर सायकलची जोरदार धडक झाली. या अपघातात कृष्णा हलगे जागीच ठार झाला.

घटनेची माहिती गावात कळताच नागरिकांनी घटनास्थळी धाव घेतली. कृष्णा स्वभावाने अतिशय मनमिळावू आणि सर्वांशी प्रेमाने वागणारा होता. त्याच्या अकाली निधनाने आजेगावसह संपूर्ण परिसरात हळहळ व्यक्त केली जात आहे. कृष्णाचे वडील गजानन हलगे यांचेही गेल्या वर्षीच अचानक निधन झाले होते. आई-वडिलांचा तो लाडका आणि घरात एकुलता एक मुलगा होता. त्याच्या पश्चात आई, पाच बहिणी, पत्नी व दोन मुले असा परिवार आहे.

अपघातानंतर (Ajegaon pickup accident) पोलिसांनी पिकअप वाहन ताब्यात घेऊन पंचनामा केला आहे. मृतदेह पुढील प्रक्रियेसाठी सामान्य रुग्णालयात पाठवण्यात आला होता. रविवारी आजेगाव येथील स्मशानभूमीत शोकाकुल वातावरणात त्याच्यावर अंत्यसंस्कार करण्यात आले. घरातील एकुलता एक आधार हरपल्याने हलगे कुटुंबावर दुःखाचा डोंगर कोसळला असून गावात सर्वत्र हळहळ व्यक्त होत आहे.