दिल्लीतील विद्यार्थी लाठीचार्ज घटनेच्या निषेधार्थ 'यवतमाळ बंद' ला संमिश्र प्रतिसाद

यवतमाळ (Yavatmal Bandh Protest) : नीट पेपर फुटी प्रकरणाची जबाबदारी स्वीकारून केंद्रीय शिक्षण मंत्री धर्मेंद्र प्रधान यांनी आपल्या पदाचा राजीनामा द्यावा, व सरकारने होत असलेल्या परीक्षांमध्ये पारदर्शकता आणावी या मागणीसाठी दिल्लीतील जंतर-मंतर मैदानावरील आंदोलनादरम्यान पोलिसांनी विद्यार्थ्यांनवर लाठीचार्ज करीत जखमी केले. या घटनेच्या निषेधार्थ वंचित बहुजन आघाडीच्या वतीने आज गुरुवार २३ जुलै रोजी पुकारण्यात आलेल्या 'महाराष्ट्र बंद'ला यवतमाळमध्ये संमिश्र प्रतिसाद मिळाला.

यवतमाळ जिल्हा वंचित बहुजन आघाडीकडून मोदी सरकार विरोधात जोरदार घोषणाबाजी करीत शहरातील संविधान चौकात ते जिल्हाधिकारी कार्यालयावर (Yavatmal Bandh Protest) धडक मोर्चा काढून घटनेचा तीव्र निषेध व्यक्त केला. यावेळी दत्त चौक, बाजार लाइन, नेताजी चौक व इतर भागातील व्यवसायिकांना गुलाबाचे फुल देऊन बंद ठेवण्यात सहकार्य करावे, असे आवाहन करण्यात आले असून या मोर्चात शहरातील विविध राजकीय पक्षासह इतर सामाजिक संघटनांनी सहभाग घेतला.