रेल्वे इंजिनच्या धडकेत वाघाचा मादी बछडा जागीच ठार, दुसरा थोडक्यात बचावला...

सिंदेवाही वनपरिक्षेत्रातील घटना

सिंदेवाही (Tiger Accidental Death ) : सिंदेवाही वनपरिक्षेत्रातून एक अत्यंत धक्कादायक आणि वन्यप्रेमींचे काळीज पिळवटून टाकणारी घटना समोर आली आहे. सिंदेवाही वनपरिक्षेत्रातील लोनखैरी नियत क्षेत्रात (बीट) येणाऱ्या रेल्वे लाईनवर रेल्वे इंजिनच्या जोरदार धडकेत एका पट्टेदार वाघाच्या मादी बछड्याचा जागीच मृत्यू झाला. तर दुसरा बछडा थोडक्यात बचावल्या ची दुर्दैवी घटना आज, गुरुवारी पहाटे ५:१५ वाजताच्या सुमारास घडली.

​मिळालेल्या माहितीनुसार, चंद्रपूरकडून सिंदेवाहीच्या दिशेने क्रमांक ४१८२० चे रेल्वे इंजिन येत होते. राजोली गावाजवळ असलेल्या लोनखैरी बिटातील कक्ष क्र. २४७ जंगल परिसरातील रेल्वे लाईन ओलांडून पट्टेदार वाघाचे दोन बछडे जात असताना एका बछड्याला इंजिनने  जोरदार धडक दिली. ही धडक इतकी भीषण होती की, मादी बछड्याचे डोके छिन्नविच्छिन्न (चेंदा मेंदा) होऊन तिचा जागीच मृत्यू झाला. तर दुसरा बछळा सुखरूप  रेल्वे ट्रॅक ओलांडली. (Tiger Accidental Death) मृत बछड्याचे वय अंदाजे १६ ते १८ महिने असल्याचे सांगण्यात येत आहे.

घटनेची माहिती मिळताच सिंदेवाहीच्या वनपरिक्षेत्र अधिकारी अंजली बोरावार यांच्या मार्गदर्शनाखाली क्षेत्र सहाय्यक नितीन गडपायले यांनी कर्मचाऱ्यांसह तातडीने घटनास्थळ गाठले. वनविभागाने मृत वाघाचा पंचनामा करून शवविच्छेदन (Post-Mortem) केले. या अपघाताप्रकरणी रेल्वे इंजिन चालकावर वनकायद्यांतर्गत गुन्हा दाखल करण्यात आला आहे.

सिंदेवाही वनपरिक्षेत्रात गेल्या महिनाभरात वाघांच्या मृत्यूची (Tiger Accidental Death) ही दुसरी मोठी घटना आहे. गेल्या २६ एप्रिल रोजी नवरगाव-रत्नापूर शिवारात आपल्या तीन बछड्यांसह वावरणाऱ्या एका पट्टेदार वाघिणीचा मृत्यू झाला होता, ज्यामुळे तिचे तीन बछडे पोरके झाले आहेत. ती घटना ताजी असतानाच, आता सिंदेवाही जंगलात आपल्या दोन बछड्यांसह अधिवास करणाऱ्या दुसऱ्या एका वाघिणीचा एक बछडा रेल्वेच्या धडकेत दगावला. एकाच महिन्यात दोन वाघांचा असा दुर्दैवी अंत झाल्याने वन्यजीव प्रेमींमध्ये तीव्र संताप आणि हळहळ व्यक्त होत असून, रेल्वे मार्ग व वन्यजीव सुरक्षेचा प्रश्न पुन्हा ऐरणीवर आला आहे.