पंढरपूरहून परतणाऱ्या वारकऱ्यांच्या जीपला भीषण अपघात; बीडमध्ये एकाचा मृत्यू, ११ जण गंभीर जखमी

केज-कळंब रस्त्यावरील साळेगावजवळ जीप, ट्रॅक्टर आणि कारची जोरदार धडक; कळंब व अंबाजोगाई येथील रुग्णालयांत जखमींवर उपचार सुरू

आषाढी एकादशीची पंढरपूर वारी पूर्ण करून वाशिमकडे परतणाऱ्या वारकऱ्यांवर काळाने घाला घातला आहे. बीड जिल्ह्यातील केज-कळंब मार्गावरील साळेगावजवळ जीप, ट्रॅक्टर आणि कार यांच्यात झालेल्या भीषण अपघातात एका वृद्ध वारकऱ्याचा जागीच मृत्यू झाला, तर ११ जण गंभीर जखमी झाले आहेत. सर्व जखमींना तातडीने उपचारासाठी रुग्णालयात दाखल करण्यात आले आहे.

माहितीनुसार, पंढरपूर येथील वारी आटोपल्यानंतर वारकरी जीपमधून वाशिमकडे निघाले होते. दरम्यान, बीड जिल्ह्यातील साळेगाव परिसरात जीप, ट्रॅक्टर आणि कार यांच्यात जोरदार धडक झाली. या तिहेरी अपघातात वाहनांचे मोठे नुकसान झाले असून वारकऱ्यांना गंभीर दुखापती झाल्या.

अपघाताचा आवाज परिसरात घुमल्यानंतर स्थानिक नागरिकांनी तातडीने घटनास्थळी धाव घेतली. घटनेची माहिती मिळताच पोलिसांनीही तत्काळ घटनास्थळी पोहोचून ग्रामस्थांच्या मदतीने बचावकार्य सुरू केले. जखमींना रुग्णवाहिकांच्या साहाय्याने जवळच्या कळंब आणि अंबाजोगाई येथील शासकीय रुग्णालयात उपचारासाठी दाखल करण्यात आले.

या दुर्घटनेत एका वृद्ध वारकऱ्याचा जागीच मृत्यू झाला. पंचनामा पूर्ण केल्यानंतर मृतदेह शवविच्छेदनासाठी शासकीय रुग्णालयात पाठविण्यात आला आहे. अपघाताचे नेमके कारण काय होते, याचा तपास पोलीस करत असून पुढील तपास सुरू आहे.