नागपूर मध्ये रेल्वेच्या धडकेत सख्ख्या दोन भावांचा दुर्दैवी मृत्यू; परिसरात शोककळा, दुर्घटनेचा तपास सुरू

सावनेर : सावनेर शहरात गुरुवारी (दि. ३० जुलै) सकाळी अंदाजे १०.१५ वाजताच्या सुमारास रेल्वेच्या धडकेत सख्ख्या दोन भावांचा जागीच दुर्दैवी मृत्यू झाल्याची हृदयद्रावक घटना घडली. या घटनेमुळे संपूर्ण सावनेर शहरात शोककळा पसरली असून मृतांच्या कुटुंबीयांवर दुःखाचा डोंगर कोसळला आहे. घटनेची माहिती मिळताच नागरिकांनी घटनास्थळी मोठी गर्दी केली.

मृतांची ओळख निरंजन लक्ष्मण फिरके (वय ४० वर्षे) व योगेश लक्ष्मण फिरके (वय ३७ वर्षे), रा. सावनेर अशी झाली आहे. दोघे सख्खे भाऊ असल्याने या घटनेने सर्वत्र हळहळ व्यक्त होत आहे.

घटनेची माहिती सर्वप्रथम सामाजिक कार्यकर्ते हितेश बनसोड यांना अंकित हांडे यांनी दिली. माहिती मिळताच हितेश बनसोड यांनी तात्काळ सावनेर पोलीस ठाण्याच्या पोलीस निरीक्षक ऋतुजा जाधव यांच्याशी संपर्क साधून घटनेची माहिती दिली. त्यानंतर पोलीस निरीक्षक ऋतुजा जाधव यांच्या मार्गदर्शनाखाली पोलीस पथक तातडीने घटनास्थळी दाखल झाले. पोलिसांनी परिसराची पाहणी करून पंचनामा करण्यास सुरुवात केली तसेच घटनेची प्राथमिक माहिती संकलित केली.

दरम्यान, हितज्योती आधार फाउंडेशनच्या सदस्यांनी स्थानिक ग्रामस्थांच्या मदतीने तातडीने बचावकार्य हाती घेतले. घटनास्थळी पोहोचताच दोन्ही जखमींना रेल्वे रुळांवरून बाहेर काढून सावनेर येथील शासकीय रुग्णालयात हलविण्यात आले. मात्र, वैद्यकीय अधिकाऱ्यांनी तपासणीनंतर दोघांचाही मृत्यू झाल्याचे घोषित केले. त्यानंतर आवश्यक कायदेशीर प्रक्रिया पूर्ण करून दोन्ही मृतदेह शवविच्छेदनासाठी पाठविण्यात आले.

ही दुर्घटना नेमकी कशामुळे घडली, दोघे रेल्वे रुळांवर कसे आले, अपघाताचे नेमके कारण काय होते, याचा तपास सावनेर पोलीस विविध अंगांनी करीत आहेत. प्राथमिक माहितीनुसार घटनेचे कारण अद्याप स्पष्ट झाले नसून, पोलिसांकडून प्रत्यक्षदर्शींची माहिती तसेच इतर उपलब्ध पुराव्यांच्या आधारे तपास सुरू आहे.

या घटनेची बातमी शहरात वाऱ्यासारखी पसरताच मोठ्या संख्येने नागरिकांनी घटनास्थळ आणि शासकीय रुग्णालय परिसरात गर्दी केली. सख्ख्या दोन भावांचा एकाच दुर्घटनेत मृत्यू झाल्याने सर्वत्र हळहळ व्यक्त होत असून त्यांच्या कुटुंबीयांवर दुःखाचा मोठा आघात झाला आहे.

मदतकार्यात सहभागी हितज्योती आधार फाउंडेशनचे सदस्य

• अंकित हांडे
• नरेंद्र समदूरकर
• आकाश यादव
• अण्णा सिंदेवार
• आर्यन कातकडे
• तसेच स्थानिक ग्रामस्थ

त्यांच्या तत्परतेमुळे दोघांना तातडीने रुग्णालयात हलविण्यात आले, मात्र डॉक्टरांनी त्यांना मृत घोषित केले.

सावनेर पोलीस या प्रकरणाचा अधिक तपास करीत असून शवविच्छेदन अहवाल आणि इतर पुराव्यांच्या आधारे पुढील कार्यवाही करण्यात येणार आहे.