वारंवार निवेदने आणि आंदोलने करूनही रस्त्याचे काम सुरू न झाल्याने ग्रामस्थांनी निषेध नोंदविला.
सार्वजनिक बांधकाम विभागाच्या उपविभागीय अभियंत्यांच्या खुर्चीला हार घालून निवेदन
परभणी (Road Issue) : गंगाखेड तालुक्यातील खळी, चिंचटाकळी, गौंडगाव, मैराळसांवगी मार्गे धारासूरकडे जाणाऱ्या रस्त्याची दुरवस्था आणि प्रलंबित कामे तात्काळ पूर्ण करण्याच्या मागणीसाठी संतप्त ग्रामस्थांनी सार्वजनिक बांधकाम विभागाच्या उपविभागीय अभियंत्यांच्या रिकाम्या खुर्चीला हार घालून अनोखे आंदोलन केले. वारंवार निवेदने आणि आंदोलने करूनही रस्त्याचे काम सुरू न झाल्याने ग्रामस्थांनी हा निषेध नोंदविला.
गंगाखेड-परभणी मार्गावरील खळी पाटी येथून खळी, चिंचटाकळी, गौंडगाव, मैराळसांवगी मार्गे धारासूरकडे जाणारा रस्ता अत्यंत खराब अवस्थेत आहे. तसेच रूमणा पाटी ते धारासूर या मार्गावरील कामही अद्याप प्रलंबित असल्याचा आरोप ग्रामस्थांनी केला आहे. या दोन्ही रस्त्यांची कामे तातडीने पूर्ण करण्यात यावीत, यासाठी संबंधित विभागाकडे अनेकदा निवेदने देण्यात आली असून आंदोलनेही करण्यात आली. मात्र अद्याप कामास सुरुवात झालेली नाही.
या पार्श्वभूमीवर शुक्रवारी (१२ जून) दुपारी १ वाजता ग्रामस्थांनी सार्वजनिक बांधकाम विभागाच्या गंगाखेड येथील उपविभागीय कार्यालयात जाऊन उपविभागीय अभियंता अरविंद बामणीकर यांची भेट घेण्याचा प्रयत्न केला. मात्र ते कार्यालयात उपस्थित नसल्याचे ग्रामस्थांनी सांगितले.
यामुळे संतप्त झालेल्या खळी, चिंचटाकळी, गौंडगाव, मैराळसांवगी आणि धारासूर परिसरातील ग्रामस्थांनी उपविभागीय अभियंत्यांच्या रिकाम्या खुर्चीला हार अर्पण करून निषेध व्यक्त केला. तसेच रस्त्याचे डांबरीकरण आणि प्रलंबित कामे तातडीने पूर्ण करण्याच्या मागणीचे निवेदनही त्या खुर्चीसमोर सादर करण्यात आले.
ग्रामस्थांच्या म्हणण्यानुसार, सार्वजनिक बांधकाम विभागाच्या गंगाखेड येथील कार्यालयात शिपायाव्यतिरिक्त इतर कोणताही कर्मचारी उपस्थित नव्हता. तसेच उपविभागीय अभियंता अरविंद बामणीकर हे कार्यालयात सहसा उपलब्ध नसतात आणि दूरध्वनीलाही प्रतिसाद देत नाहीत, असा आरोप आंदोलकांनी केला.
यावेळी बोलताना कॉम्रेड ओंकार पवार यांनी रस्त्याच्या कामाबाबत प्रशासनाने तातडीने निर्णय घ्यावा, अन्यथा यापेक्षाही तीव्र आंदोलन छेडण्यात येईल, असा इशारा दिला.
या आंदोलनामुळे सार्वजनिक बांधकाम विभागाच्या कार्यपद्धतीबाबत नागरिकांमध्ये नाराजी व्यक्त होत असून संबंधित रस्त्यांच्या कामांकडे प्रशासनाचे लक्ष वेधले गेले आहे.