परभणीत रेल्वेसमोर उडी मारून जेसीबी चालक तरुणाची आत्महत्या

गंगाखेड शहरातील घटना; अकस्मात मृत्यूची नोंद

परभणी (Railway Track) : गंगाखेड शहरातील यज्ञभूमी, सारडा कॉलनी परिसरातील रेल्वे रुळावर धावत्या रेल्वेसमोर उडी मारून एका जेसीबी चालकाने आत्महत्या केल्याची घटना रविवारी (२८ जून) सकाळी सुमारे १० वाजता घडली. या प्रकरणी गंगाखेड पोलीस ठाण्यात अकस्मात मृत्यूची नोंद करण्यात आली आहे.

मिळालेल्या माहितीनुसार, तुळजाभवानी नगर, गंगाखेड येथील रहिवासी बळीराम अर्जुन इंगळे (वय ३८) हे जेसीबी चालक म्हणून काम करत होते. पत्नीसोबत झालेल्या कौटुंबिक वादानंतर दहा दिवसांपूर्वी पत्नी माहेरी गेल्यामुळे ते मानसिक तणावात असल्याची माहिती समोर आली आहे.

रविवारी सकाळी सुमारे १० वाजण्याच्या सुमारास त्यांनी शहरातील यज्ञभूमी, सारडा कॉलनी परिसरातील रेल्वे रुळावर परळीमार्गे हैदराबादकडे जाणाऱ्या पूर्णा–हैदराबाद रेल्वेसमोर उडी मारली. या दुर्घटनेत त्यांचा जागीच मृत्यू झाला.

रेल्वे चालक अरविंदकुमार आणि तेजस तेलंगे यांनी घटनेची माहिती रेल्वे प्रशासनाला दिल्यानंतर गंगाखेड पोलीस ठाण्याचे पोलीस शिपाई परसराम परचेवाड, विठ्ठल हेडे, प्रकाश गिराम तसेच रेल्वे पोलीस सहाय्यक पोलीस उपनिरीक्षक डी. प्रसाद, पोलीस हवालदार रंगनाथ पाटील यांनी घटनास्थळी धाव घेतली.

परमेश्वर आश्रोबा जाधव यांनी दिलेल्या माहितीनंतर मयताचा भाऊ जगन्नाथ अर्जुन इंगळे घटनास्थळी पोहोचला. त्यानंतर मृतदेह शवविच्छेदनासाठी गंगाखेड उपजिल्हा रुग्णालयात हलविण्यात आला.

याप्रकरणी जगन्नाथ अर्जुन इंगळे (वय २५) यांनी दिलेल्या खबरीवरून गंगाखेड पोलीस ठाण्यात अकस्मात मृत्यूची नोंद करण्यात आली असून, पुढील तपास पोलीस हवालदार रामेश्वर सपकाळ करीत आहेत.