हिंगोली ते नांदेड जाणाऱ्या राष्ट्रीय महामार्ग क्रमांक १६१ वर आज सकाळी एक दुर्दैवी घटना घडली.
हिंगोली : हिंगोली ते नांदेड जाणाऱ्या राष्ट्रीय महामार्ग क्रमांक १६१ वर आज सकाळी एक दुर्दैवी घटना घडली. कळमनुरी तालुक्यातील जरोडा गावाजवळ रस्ता ओलांडत असलेल्या एका गाभण हरणीला भरधाव वाहनाने धडक दिली. या धडकेत हरणीचा जागीच मृत्यू झाला.
अपघाताची माहिती मिळताच महामार्ग पोलीस ठाण्याचे खोकले यांनी तातडीने घटनास्थळी धाव घेतली. त्याचवेळी परिसरातील काही प्राणीमित्रांनाही या घटनेची माहिती मिळाली. त्यांनी घटनास्थळी येऊन पाहणी केली असता हरणीचा मृत्यू झाल्याचे स्पष्ट झाले.
माणुसकीचे उदाहरण देत प्राणीमित्रांनी मृत हरणीचा कोणताही अपमान न करता तिच्यावर सन्मानाने अंत्यसंस्कार करण्याचा निर्णय घेतला. स्थानिकांच्या मदतीने सर्व विधी पार पाडण्यात आले.
या कार्यात सुनील माखने आणि बाबासाहेब पुंडगे यांनी विशेष सहकार्य केले. त्यांच्या पुढाकारामुळे मृत हरणीला योग्य प्रकारे अखेरचा निरोप देण्यात आला.
राष्ट्रीय महामार्गावर वन्यजीवांचा वावर असलेल्या ठिकाणी वाहनचालकांनी वेगावर नियंत्रण ठेवावे, असे आवाहन यावेळी प्राणीमित्रांनी केले. अन्यथा अशा निष्पाप जीवांचे बळी जात राहतील, अशी खंतही त्यांनी व्यक्त केली.