पातुरात लोकशाहीचा उत्सव; नगराध्यक्ष व नगरसेवक पदासाठी आज मतदान

१७ हजार मतदार ठरवणार भवितव्य; नगराध्यक्षपदासाठी पाच उमेदवार रिंगणात, २० नगरसेवक पदांसाठी ७५ जणांचे नशीब पणाला

पातुर (Patur Municipal Council Election) : पातुर नगरपरिषदेच्या सार्वत्रिक निवडणुकीसाठी आज, २० जून २०२६ रोजी प्रत्यक्ष मतदानाला सुरुवात झाली आहे. या निवडणुकीत नगराध्यक्षपदासाठी ५, तर २० नगरसेवक पदांसाठी तब्बल ७५ उमेदवार निवडणूक रिंगणात आपले नशीब आजमावत आहेत. सकाळी ७.३० ते सायंकाळी ५.३० वाजेपर्यंत मतदानाची वेळ निश्चित करण्यात आली असून संपूर्ण शहराचे लक्ष या लढतीकडे लागले आहे. २१ जून रोजी सकाळी १० वाजल्यापासून मतमोजणी होणार असून त्याच दिवशी निकाल जाहीर होणार आहे.

नगराध्यक्षपदासाठी अटीतटीची लढत

नगराध्यक्षपदाच्या एका जागेसाठी पाच उमेदवारांमध्ये चुरशीची लढत होत आहे. प्रमुख उमेदवार पुढीलप्रमाणे आहेत:

• भाजप – सचिन समाधान ढोणे
• शिवसेना (उद्धव बाळासाहेब ठाकरे) – राष्ट्रीय काँग्रेस आघाडी – हिदायत खान रूम खान उर्फ ईदू पैलवान
• शिवसेना (शिंदे गट) – सुभाष बोचरे
• विकास योद्धा मंच – सय्यद बुरान सय्यद नबी
• अपक्ष – सलाबत खान हफिजुल्ला खान

या पाच उमेदवारांमध्ये थेट आणि अटीतटीची लढत होत असून मतदारांचा कौल कोणाच्या बाजूने जाणार, याकडे सर्वांचे लक्ष लागले आहे.

प्रत्येक मतदाराला दाबावी लागणार तीन बटणे

यंदाच्या निवडणुकीचे प्रमुख वैशिष्ट्य म्हणजे प्रत्येक मतदाराला नगराध्यक्ष आणि दोन नगरसेवक अशा तीन पदांसाठी एकाच वेळी मतदान करावे लागणार आहे. त्यामुळे ईव्हीएम (EVM) मशीनवर प्रत्येक मतदाराला एकूण तीन बटणे दाबावी लागणार आहेत. मतदारांमध्ये संभ्रम निर्माण होऊ नये म्हणून विविध पक्षांकडून डमी ईव्हीएमद्वारे जनजागृती करण्यात आली होती.

दिव्यांग मतदारांसाठी विशेष सुविधा; चोख सुरक्षा व्यवस्था

मतदान प्रक्रिया सुरळीत पार पाडण्यासाठी प्रशासनाने जय्यत तयारी केली आहे. पातुर नगरपरिषद हद्दीत ७ ठिकाणी २२ मतदान केंद्रांची व्यवस्था करण्यात आली असून ११० कर्मचाऱ्यांची नियुक्ती करण्यात आली आहे.

दिव्यांग मतदारांसाठी मतदान केंद्रांवर सायकलसह आवश्यक सुविधा उपलब्ध करून देण्यात आल्या आहेत. तसेच निवडणूक शांततेत, निर्भय वातावरणात आणि पारदर्शक पद्धतीने पार पडावी यासाठी प्रशासनाने चोख पोलीस बंदोबस्त तैनात केला आहे. नागरिकांनी मोठ्या संख्येने मतदान करावे, असे आवाहन प्रशासनाकडून करण्यात आले आहे.

१७ हजार मतदार ठरवणार नगरपरिषदेचे भवितव्य

पातुर शहरातील मतदारांची संख्या सुमारे १७ हजार असून यंदा विक्रमी मतदान होण्याची शक्यता वर्तवली जात आहे. मतदानाचा टक्का वाढवण्यासाठी निवडणूक निर्णय अधिकारी तथा बाळापूर उपविभागीय अधिकारी संतोष येवलेकर, तहसीलदार डॉ. राहुल वानखडे आणि मुख्याधिकारी ए. बी. गडलिंग यांच्या मार्गदर्शनाखाली शहरात मतदार जागृती दिंडी काढण्यात आली होती. तसेच १९ जून रोजी सर्व मतदान केंद्रांवर निवडणूक साहित्याचे वितरण पूर्ण करण्यात आले होते.

आता या १७ हजार मतदारांच्या कौलावर नगराध्यक्षपदाची माळ कोणाच्या गळ्यात पडणार आणि २० नगरसेवक पदांवर कोण बाजी मारणार, याचा फैसला उद्या, २१ जून रोजी मतमोजणीनंतर स्पष्ट होणार आहे.