Parbhani Bank Election: वसमत मधून आमदार राजूभैय्या नवघरे, हिंगोलीतून सौ. राजामती शिवाजीराव मुटकुळे आणि कळमनुरीतून अभय पाटील सावंत या तिन्ही उमेदवारांचा अपेक्षेप्रमाणे विजय झाला
दि. परभणी जिल्हा मध्यवर्ती बँक निवडणूक; अपेक्षेप्रमाणे तिन्ही उमेदवारांचा विजय
विजयानंतर समर्थका कडून मोठा जल्लोष
हिंगोली (Parbhani Bank Election) : दि. परभणी जिल्हा मध्यवर्ती सहकारी बँक निवडणूकीच्या मतदानानंतर २० जुलैला मतमोजणी झाली. यामध्ये वसमत मधून आमदार राजूभैय्या नवघरे, हिंगोलीतून सौ. राजामती शिवाजीराव मुटकुळे आणि कळमनुरीतून अभय पाटील सावंत या तिन्ही उमेदवारांचा अपेक्षेप्रमाणे विजय झाला. या विजयानंतर समर्थकांनी मोठा जल्लोष केला.
या निवडणूकीसाठी २१ संचालक निवडण्यात आले. तर १३ संचालक बिनविरोध निवडूण आले होते. ८ संचालक निवडीसाठी १९ जुलैला मतदान पार पडले. २० जुलैला जायकवाडी परिसरातील कल्याण मंडपम्मध्ये मतमोजणी पार पडली. यामध्ये प्राथमिक कृषि पतपुरवठा/ वि.का.से.संस्था ता.वसमत यामधून आमदार चंद्रकांत नवघरे यांना ५८ मते पडल्याने ते विजयी झाले. त्यांच्या विरोधातील जाधव तुषार देवराव यांना केवळ २० मते मिळाली. यात १ मतदान अवैध ठरले. प्राथमिक कृषि पत पुरवठा / वि.का.से.संस्था ता. हिंगोली यामधून मुटकुळे राजामती शिवाजी यांना ५९ मतदान मिळाल्याने त्यांना विजयी घोषित केले. त्यांचे प्रतिस्पर्धी शिंदे रमेश विठ्ठलराव यांना ३१ मतदान मिळाले. ५ मते अवैध ठरली. प्राथमिक कृषि पत पुरवठा / वि.का.से.संस्था ता. कळमुनरी यामध्ये शेवाळा येथील सावंत अभय अरूणराव यांना ३५ मते मिळाल्याने त्यांना विजयी घोषित केले. त्यांचे प्रतिस्पर्धी मगर बालासाहेब उत्तमराव यांना ३० तर कदम दत्तराव बापुराव यांना १२ मते मिळाली. एकुण ७७ मतदारांमध्ये १ मत बाद ठरले. विजयाची घोषणा झाल्यानंतर हिंगोली, वसमत, कळमनुरी या ठिकाणी मोठा जल्लोष करण्यात आला.
प्राथमिक कृषि पत पुरवठा / वि.का.से.संस्था ता. पुर्णा जि. परभणी यामधून डाखोरे नंदकुमार लक्ष्मणराव यांना ३४ मते मिळाल्याने ते विजयी ठरले. त्यांचे प्रतिस्पर्धी बोबडे तुळशिराम यशवंतराव यांना २८ मते मिळाली. एकुण ६२ मतदानामध्ये ३ मते अवैध ठरली. प्राथमिक कृषि पत पुरवठा / वि.का.से.संस्था ता. मानवत जि. परभणी चोखट आकाश पंडीतराव यांना २० मते मिळून ते विजयी झाले. त्यांचे प्रतिस्पर्धी कदम अमोल गंगाधरराव यांना १५ मते मिळाली. इतर शेती संस्थामध्ये खान सईद शेरगुलखान यांना २९० मते मिळून ते विजयी झाले. त्यांचे प्रतिस्पर्धी जामकर विजय रावसाहेब यांना २८७ मते मिळाली. एकुण ५७७ मतदानामध्ये ६ मते अवैध ठरली.
अनु जाती/ अनु जमातीमध्ये बोबडे शोभा हनुमंतराव यांना १२१६ मते मिळून त्या विजयी झाल्या. त्यांचे प्रतिस्पर्धी ठाकुर प्रशास चंद्रशेखर यांना १२ तर रूमाले तुकाराम धोंडबा यांना ९, वाटोडे यशवंतराव चंपतराव यांना ११, सरोदे अतुल गोपीनाथराव यांना १७६, सारणीकर संजय ज्ञानोबा यांना ३ मते मिळाली. एकुण १४२७ वैध मतपत्रिकेत ५४ मतपत्रिका वैध ठरल्या. वि.ज./भ.ज/वि.मा.प्र. यामध्ये मायंदळे दत्तात्रय रामभाऊ यांना १०६६ मते मिळाल्याने त्यांना विजयी घोषित केले. त्यांचे प्रतिस्पर्धी कुंडगीर अभय बालासाहेब यांना ५, परिहार स्वराजसिंह शिवपालसिंह यांना ३४८, फलके सुनंदा अशोकराव यांना ९, सोरेकर बळीराम रामचंद्र यांना ३ मते मिळाली. एकुण १४३१ वैध मतपत्रिकेत ५० मतपत्रिका अवैध ठरल्या.