परभणी शहरात ११० कोटींच्या विकासकामांना मंजुरी

पहिल्या टप्प्यात मनपासाठी २० कोटी खा. संजय जाधव यांच्या पाठपुराव्याला यश

परभणी (Parbhani Development Work) : शहरातील ११० कोटीच्या विविध विकासकामांसाठी उपमुख्यमंत्री तथा नगरविकास मंत्री एकनाथ शिंदे यांनी मंजुरी दिली आहे. पहिल्या टप्प्यात परभणी मनपासाठी २० कोटीच्या निधीचा शासन निर्णय आला आहे. खा. संजय जाधव यांनी केलेल्या पाठपुराव्याला यश आले आहे.  

शहर महापालिका क्षेत्रात मुलभूत सोयी- सुविधांच्या विकासासाठी २० कोटी, नटराज रंग मंदिराच्या नवीन बांधकामासाठी ३० कोटी, परभणी महापालिकेच्या प्रशासकीय इमारत बांधकामासाठी ६० कोटी असा एकूण ११० कोटी रुपयांच्या विकासकामांचा समावेश आहे. नगर विकास विभागाने महापालिका क्षेत्रात मुलभूत सोयी - सुविधांच्या विकासासाठी विशेष तरतूदी अंतर्गत निधी दिला आहे. यातून शहरातील विविध प्रभागात रस्ते, नाल्या, पथदिवे तसेच इतर मुलभूत सुविधा उपलब्ध करुन देण्यात येणार आहेत. त्याच बरोबर महापालिकेच्या स्थायी समिती बैठकीत सभापती प्रतिभाताई अतुल सरोदे यांनी शहरात समांतर पाणीपुरवठा योजना, भूमिगत गटार योजनेचे नवीन प्रस्ताव शासनाकडे पाठविण्याचा ठराव घेतला होता.

या (Parbhani Development Work) प्रस्तावाला उपमुख्यमंत्री तथा नगरविकास मंत्री एकनाथ शिंदे यांनी मंजुरी दिली आहे. या अगोदरच्या योजनेत समांतर पाणी पुरवठ्यासाठी १५० कोटी आणि भूमिगत गटारासाठी ४५० कोटीचा निधी होता. हा प्रस्ताव रद्द करण्यात आला. त्यानंतर शहराच्या वाढीव भागाचा प्रस्तावात समावेश करुन नवीन प्रस्ताव शासनाकडे पाठविण्यात आला. त्यानुसार समांतर पाणी पुरवठ्याच्या २५० कोटी आणि भूमिगत गटारच्या जवळपास ५७४ कोटी रुपयांच्या नवीन प्रस्तावास मंजुरी मिळेल, असे आश्वासन उपमुख्यमंत्र्यांनी दिले आहे. 

परभणी शहराचा विकास हेच ध्येय
परभणी शहराचा सर्वांगीण (Parbhani Development Work) आणि नियोजनबध्द विकास हेच माझे ध्येय आहे. नागरीकांना मुलभूत सुविधा मिळाव्यात यासाठी शासनाकडे सातत्याने पाठपुरावा करत आहे. २० कोटी रुपयांचा निधी आला आहे. उर्वरित निधीसाठीही सतत पाठपुरावा सुरू राहिल. पाणी पुरवठा, भूमिगत गटारच्या वाढीव प्रस्तावांना मंजुरी मिळाली आहे. शहराचा पुढील तीस वर्षाचा विस्तार लक्षात घेऊन ही योजना राबविण्यात येणार आहे. यापुढेही शहराच्या विकासासाठी कटीबध्द आहे.
- खा. संजय उर्फ बंडू जाधव