तालुक्यात नैसर्गिक आपत्तीमुळे मृत्यू झालेल्या शेतकऱ्याच्या वारसाला शासनाकडून ४ लाख रुपयांचे सानुग्रह अनुदान मंजूर करण्यात आले आहे.
सेनगाव तहसीलदारांचा आदेश; शासनाकडून सानुग्रह मदत मंजूर
सेनगाव (Natural Disaster Relief) : तालुक्यात नैसर्गिक आपत्तीमुळे मृत्यू झालेल्या शेतकऱ्याच्या वारसाला शासनाकडून ४ लाख रुपयांचे सानुग्रह अनुदान मंजूर करण्यात आले आहे. याबाबतचा अधिकृत आदेश सेनगावचे तहसीलदार सखाराम मांडवगडे यांनी जारी केला आहे.
मिळालेल्या माहितीनुसार, सेनगाव तालुक्यातील भानखेडा येथील शेतकरी जगन्नाथ सिताराम कोटकर हे शेतात नांगरणीचे काम करीत असताना अचानक वीज कोसळल्याने त्यांचा दुर्दैवी मृत्यू झाला होता. ही घटना नैसर्गिक आपत्तीच्या स्वरूपातील असल्याने शासनाच्या नियमांनुसार त्यांच्या वारसांना आर्थिक मदत देण्याची प्रक्रिया सुरू करण्यात आली होती.
महसूल व वन विभागाच्या शासन निर्णयानुसार तहसीलदार सखाराम मांडवगडे यांनी त्यांच्या अधिकारांचा वापर करून मृत शेतकऱ्यांच्या पत्नी श्रीमती मिराबाई जगन्नाथ कोटकर यांना ४ लाख रुपयांचे सानुग्रह अनुदान मंजूर केले आहे.
सदर अनुदान ‘नैसर्गिक आपत्ती निवारण’ या लेखाशिर्षांतर्गत वितरित करण्यात येणार आहे. या आर्थिक मदतीमुळे दुःखद प्रसंगाला सामोरे जाणाऱ्या कुटुंबाला दिलासा मिळणार असल्याचे सांगण्यात येत आहे.
दरम्यान, या आदेशाची प्रत माहिती व पुढील कार्यवाहीसाठी जिल्हाधिकारी हिंगोली तसेच उपकोषागार अधिकारी, सेनगाव यांना पाठविण्यात आली आहे.