मरडवार लेआउटवासीयांचा पालिकेला समस्यांचा पाढा

बगीचा, नाला सुरक्षा भिंत व बेवारस डुकरांच्या बंदोबस्ताची मागणी

कळमेश्वर (Kalameshwar Municipal Administration) : येथील मरडवार लेआउट (तळ्याची पाळ) परिसरातील नागरिकांनी आपल्या विविध प्रलंबित समस्यांकडे पालिका प्रशासनाचे लक्ष वेधत नगराध्यक्ष अविनाश माकोडे व मुख्याधिकारी आकाश सुरडकर यांना निवेदन सादर केले. निवेदनात नागरिकांनी नमूद केले की, मरडवार लेआउट परिसरात गेल्या अनेक वर्षांपासून काही भूखंड बांधकामाविना पडून आहेत. हे भूखंड पालिकेने हस्तगत करून त्या ठिकाणी नागरिकांसाठी सुशोभित बगीच्याची निर्मिती करण्यात यावी. तसेच परिसरातील जुन्या विहिरीचा उपसा करून सुरक्षिततेची उपाययोजना करावी, उघड्या नाल्यावर सुरक्षा भिंत उभारावी आणि लेआउटमध्ये मोठ्या प्रमाणात वावरणाऱ्या बेवारस डुकरांचा तातडीने बंदोबस्त करण्यात यावा, अशी मागणी करण्यात आली.

या (Kalameshwar Municipal Administration) समस्यांमुळे परिसरातील नागरिकांना आरोग्य व सुरक्षेच्या दृष्टीने मोठ्या अडचणींचा सामना करावा लागत असल्याचेही निवेदनात नमूद करण्यात आले. नागरिकांच्या मागण्यांकडे प्रशासनाने गांभीर्याने लक्ष देऊन तातडीने कार्यवाही करावी, अशी अपेक्षा यावेळी व्यक्त करण्यात आली. निवेदन देताना राजेश मुंदडा, आनंद कळंबे, प्रवीण मरडवार, गणेश शिरभाते, राजेश भराडे, अनिल धरपाळ, भागवत चोपडे, हितेश भोगे, अतुल श्रीखंडे, रमेश डाबरे, राजेश शिरभाते, शामकांत नेरकर आदी नागरिक उपस्थित होते.