पळसगाव येथे वनविभागाची धडक कारवाई; लाखो रुपयांचा अवैध सागवान साठा जप्त

नवेगावबांध/ गोंदिया (Palasgaon Forest Action) : गोपनीय माहितीच्या आधारे वनविभागाने मौजा पळसगाव येथे एका घराबाहेर व घरात सुरू असलेल्या अवैध सागवान चिरान व्यवसायावर छापा टाकून लाखो रुपयांचा मुद्देमाल जप्त केला आहे. ही धडक कारवाई २७ जून २०२६ रोजी सकाळी ९:०० वाजताच्या सुमारास करण्यात आली, ज्याची सविस्तर चौकशी ३० जून २०२६ पर्यंत पूर्ण करण्यात आली आहे.

झाशीनगर (वन्यजीव) वनपरिक्षेत्र, बोंडे (बफर) सहवनक्षेत्र आणि धमेदीटोला नियत क्षेत्रांतर्गत येणाऱ्या मौजा पळसगाव येथील रहिवासी देवानंद विश्वनाथ शहारे यांच्या घरी अवैध रित्या सागवान लाकडांचे चिरान केले जात असल्याची पक्की माहिती वनविभागाला मिळाली होती. या माहितीवरून विभागीय वन अधिकारी (न.ना.व्या.रा.क्षेत्र साकोली) अतुल देवकर आणि सहाय्यक वनसंरक्षक बालकृष्ण दुर्गे यांच्या मार्गदर्शनाखाली वनपरिक्षेत्र अधिकारी शंकर हटकर व त्यांच्या चमूने शहारे यांच्या राहत्या घरावर अचानक छापा टाकला.
या छाप्यादरम्यान वनविभागाने ६२ नग सागवान चिरान माल (०.६७४ घ.मी.), १९ नग घरासाठी वापरलेले चौपट (०.४७१ घ.मी.), १०८ नग आडजात फाटे म्हणजेच बल्ल्या (०.७६७ घ.मी.), ६ नग सागवान लाकूड (१.५४९ घ.मी.) यासह १ नग हातआरा आणि १ नग कुऱ्हाड असा लाखो रुपयांचा मुद्देमाल जप्त केला आहे.

या (Palasgaon Forest Action) यशस्वी कारवाईत वनपरिक्षेत्र अधिकारी शंकर हटकर यांच्यासह क्षेत्र सहाय्यक (बोंडे बफर) एन. डी. यादव, धमेदीटोला बिट रक्षक के. जी. जायभाये, तसेच वनरक्षक एस. जी. परशुरामकर, के. एफ. नवखरे, कु. एम. पी. केंद्रे, कु. एस. पी. साखरे, व्ही. एल. सयाम, संगणक चालक मंगेश सरजारे आणि वाहन चालक देवानंद नारनवरे या सर्व कर्मचाऱ्यांनी मोलाचे योगदान दिले. वने ही आपली राष्ट्रीय संपत्ती असून तिचे जतन करणे प्रत्येक नागरिकाचे कर्तव्य आहे. त्यामुळे झाशीनगर वनपरिक्षेत्र कार्यालयांतर्गत जंगलामध्ये कुठेही अवैध वृक्षतोड, अवैध शिकार किंवा अवैध चराई सारखे प्रकार घडत असल्यास नागरिकांनी त्वरित वनविभागाशी संपर्क साधावा, असे आवाहन वनपरिक्षेत्र अधिकारी शंकर हटकर यांनी केले आहे.