लव्ह मॅरेज चा राग; मेहुण्याच्या डोक्यात दगड घालून खूनाचा प्रयत्न

जामनेर तालुक्यातील तोरणाळे जंगलातील थरारक घटना; आरोपी अटकेत

जळगाव/जामनेर (Love Marriage Murder) : बहिणीने आंतरजातीय प्रेमविवाह केल्याचा राग मनात धरून सख्ख्या भावाने मेहुण्याला जंगलात नेऊन डोक्यात मोठा दगड घालून ठार मारण्याचा प्रयत्न केल्याची संतापजनक घटना घडली.

पोलिसांनी दिलेल्या माहितीनुसार, फत्तेपूर येथील प्रशांत चौधरी यांनी वडगाव सहो येथील तरुणीसोबत आंतरजातीय प्रेमविवाह केला होता. हा विवाह आरोपी अभिषेक मोरे याला मान्य नव्हता. सूडाच्या भावनेतून त्याने प्रशांत यांना दुचाकीवर बसवून तोरणाळे शिवारातील जंगलात नेले. तेथे वाद घालून त्यांच्या डोक्यात मोठा दगड घातला. प्रशांत यांचा मृत्यू झाल्याचा समज करून त्यांच्यावर पालापाचोळा टाकून आरोपी घटनास्थळावरून पसार झाला. मात्र, या हल्ल्यात प्रशांत सुभाष चौधरी (वय २६, रा. सुभाषपुरा, फत्तेपूर) हा गंभीर जखमी झाला असून, त्याच्यावर छत्रपती संभाजीनगर येथील घाटी रुग्णालयाच्या अतिदक्षता विभागात उपचार सुरू आहेत. त्याची प्रकृती चिंताजनक असल्याची माहिती आहे. या प्रकरणी फत्तेपूर पोलिसांनी आरोपी अभिषेक संतोष मोरे (वय १९, रा. वडगाव सडो, ता. जामनेर) याला अटक केली आहे.

जखमी प्रशांत चौधरी याने काही दिवसांपूर्वी आरोपी अभिषेक मोरे याच्या बहिणीसोबत आंतरजातीय प्रेमविवाह केला होता. या विवाहाचा राग मनात धरून आरोपीने प्रशांतला तोरणमाळे घाटातील निर्जन जंगल परिसरात नेले. तेथे २७ जुलै रोजी दुपारी ४ ते २८ जुलै रोजी पहाटे १ वाजेदरम्यान त्याच्या डोक्यावर दगडाने वार करून त्याला जीवे मारण्याचा प्रयत्न केला.या घटनेप्रकरणी जखमीची आई सरला नामदेव चौधरी (वय ५०) यांनी फत्तेपूर पोलीस ठाण्यात फिर्याद दिली. त्यानुसार आरोपी अभिषेक मोरे याच्याविरुद्ध गुन्हा दाखल करण्यात आला. फत्तेपूर पोलिसांनी भारतीय न्याय संहितेअंतर्गत खुनाच्या प्रयत्नाचा गुन्हा दाखल करून आरोपीला अटक केली आहे. पुढील तपास सुरू आहे.

समाजाला विचार करायला लावणारा प्रश्न
"सैराट" हा केवळ चित्रपट नव्हता; तो समाजाला दाखवलेला आरसा होता.
घटना बदलतात, ठिकाणे बदलतात, चेहरे बदलतात; पण आंतरजातीय विवाहाचा द्वेष, जातीच्या नावावर होणारी हिंसा आणि तथाकथित 'कौटुंबिक सन्मान' जपण्यासाठी रक्त सांडण्याची मानसिकता अजूनही संपलेली नाही. संविधानाने प्रत्येक प्रौढ व्यक्तीला आपल्या पसंतीच्या व्यक्तीसोबत विवाह करण्याचा अधिकार दिला आहे. हा अधिकार मान्य न करणारी मानसिकता हीच अशा घटनांची खरी मुळं आहेत.