Patur MNREGA Project: सुकळी येथील मनरेगा कामांमध्ये बनावट मजूरांची नावे दाखवून लाखो रु.चा अपव्यय झाल्याचा आरोप आहे. चौकशीची मागणी जिल्हाधिकाऱ्याकडे करताना गावकऱ्यांनी सखोल संशोधनाची मागणी
सुकळी येथील प्रकार : जिल्हाधिकाऱ्याकडे तक्रार
पातूर (Patur MNREGA Project) : पातूर पंचायत समिती अंतर्गत सुकळी येथे महात्मा गांधी राष्ट्रीय ग्रामीण रोजगार हमी योजने (मनरेगा) अंतर्गत सुरू असलेल्या विविध कामांमध्ये मोठ्या प्रमाणावर भ्रष्टाचार झाल्याचा गंभीर आरोप समोर आला आहे. संकेत गणेश वांडे व ग्रामस्थांनी याबाबत जिल्हाधिकारी, तहसीलदार तसेच गटविकास अधिकारी यांच्याकडे लेखी तक्रार दाखल करून सखोल चौकशीची मागणी केली आहे.
तक्रारीनुसार, नाला खोलीकरण, वृक्ष लागवड तसेच इतर विकास कामांमध्ये बनावट मजुरांची नावे दाखवून शासनाची आर्थिक फसवणूक करण्यात येत आहे. कागदोपत्री दररोज सुमारे १०० मजूर कामावर असल्याचे दाखवले जात असले तरी प्रत्यक्षात एवढ्या संख्येने मजूर उपस्थित नसल्याचा आरोप करण्यात आला आहे. या (Patur MNREGA Project) प्रकरणात रोजगार सेवक, ठेकेदार व संबंधित अधिकारी यांच्या संगनमताने गैरप्रकार सुरू असल्याचा संशय ग्रामस्थांनी व्यक्त केला आहे. विशेषतः वृक्ष लागवडीच्या कामात खोटे फोटो, बनावट हजेरी नोंदी व कागदोपत्री कामे दाखवून निधी अपहार केला जात असल्याचेही तक्रारीत नमूद आहे.
तसेच, सुकळी येथील सार्वजनिक सभागृह ते स्मशानभूमी दरम्यान प्रत्यक्षात वृक्ष लागवड न करता मस्टर व डिमांड काढल्याचा आरोप करण्यात आला आहे. त्यामुळे शासनाच्या निधीचा अपव्यय होत असल्याची चिंता ग्रामस्थांनी व्यक्त केली आहे. गावकऱ्यांनी या प्रकरणातील दोषींवर तात्काळ कारवाई करण्याची मागणी केली असून संपूर्ण प्रकरणाची निष्पक्ष चौकशी व्हावी, अशी मागणी प्रशासनाकडे करण्यात आली आहे.
उच्चस्तरीय चौकशी समितीची मागणी
सुकळी येथे मनरेगा (Patur MNREGA Project) अंतर्गत सुरू असलेल्या कामांमध्ये बनावट मजूर दाखवून लाखो रुपयांचा निधी अपहार केल्याचा आरोप करण्यात आला आहे. या संपूर्ण प्रकरणाची सखोल व निष्पक्ष चौकशी करण्यासाठी उच्चस्तरीय समिती गठीत करण्यात यावी, अशी मागणी तक्रारीतून करण्यात आली आहे.