सेनगाव तालुक्यातील दाताडा बुद्रुक रस्त्यावर दारूच्या नशेत मानव विकास बस चालविल्याप्रकरणी चालकाविरुद्ध सेनगाव पोलिस ठाण्यात गुन्हा दाखल करण्यात आला आहे.
सेनगाव तालुक्यातील दाताडा बुद्रुक रस्त्यावर दारूच्या नशेत मानव विकास बस चालविल्याप्रकरणी चालकाविरुद्ध सेनगाव पोलिस ठाण्यात गुन्हा दाखल करण्यात आला आहे. या घटनेमुळे विद्यार्थ्यांच्या सुरक्षिततेचा प्रश्न पुन्हा ऐरणीवर आला आहे.
पोलिसांनी दिलेल्या माहितीनुसार, महेश बापुराव कुमरे (रा. रिसाला बाजार, हिंगोली) हा एमएच-०६ एस-८७७५ क्रमांकाची मानव विकास बस मद्यप्राशन करून वाकडी-तिकडी चालवत असल्याचे निदर्शनास आले. ही घटना सोमवारी, २७ जुलै २०२६ रोजी सायंकाळी ४ वाजण्याच्या सुमारास सेनगाव तालुक्यातील दाताडा बुद्रुक रोडवर घडली.
या प्रकरणी वाहतूक निरीक्षक फिरोज मुस्तफा शेख (रा. हिंगोली) यांनी दिलेल्या लेखी फिर्यादीवरून सेनगाव पोलिस ठाण्यात मद्यधुंद वाहनचालकाविरुद्ध गुन्हा नोंद करण्यात आला असून, आरोपीविरुद्ध मोटार वाहन कायद्याच्या कलम १८५ अंतर्गत कारवाई करण्यात आली आहे.
या प्रकरणाचा तपास पोलीस हवालदार आर. जे. जाधव करीत असून, आरोपीस नोटीस देऊन सोडण्यात आल्याची माहिती पोलिसांनी दिली. या घटनेमुळे शालेय विद्यार्थ्यांच्या वाहतुकीसाठी वापरण्यात येणाऱ्या बसच्या सुरक्षिततेबाबत गंभीर प्रश्न उपस्थित होत असून, संबंधित विभागाने अशा चालकांवर कठोर कारवाई करण्याची मागणी पालक व नागरिकांकडून होत आहे.