सरसकट कर्जमाफीच्या मागणीसाठी शिवसेनेचा ट्रॅक्टर-बैलगाडी मोर्चा

तहसील कार्यालयावर धडक; घोषणाबाजीने सेनगाव दणाणले

सेनगाव (ShivSena Tractor-Bullock Rally) : राज्य सरकारने जाहीर केलेली शेतकरी कर्जमाफी ही प्रत्यक्षात शेतकऱ्यांची फसवणूक असून सरसकट कर्जमाफीची अंमलबजावणी तात्काळ करण्यात यावी, या प्रमुख मागणीसाठी (उबाटा) शिवसेनेच्या वतीने सेनगाव येथे मंगळवार ता. १६ जुन रोजी भव्य ट्रॅक्टर व बैलगाडी मोर्चाचे आयोजन करण्यात आले. ट्रॅक्टर, बैलगाड्या आणि शेतकऱ्यांच्या मोठ्या सहभागामुळे हा मोर्चा तालुक्यात लक्षवेधी ठरला.

सेनगाव नगरपंचायत कार्यालया समोरून सकाळी दहा वाजता वाजतगाजत मोर्चाला सुरुवात झाली. विविध घोषणांनी परिसर दणाणून सोडत मोर्चा तहसील कार्यालयाच्या प्रांगणात पोहोचला. यावेळी शिवसेना पदाधिकारी व शेतकरी प्रतिनिधींनी (ShivSena Tractor-Bullock Rally) सरकारच्या कर्जमाफी धोरणावर जोरदार टीका केली.

मोर्चामध्ये शिवसेना जिल्हाप्रमुख संदेश देशमुख, गोपू पाटील, दिलीपराव घुगे, जिल्हा समन्वयक दिनकरराव देशमुख, उपजिल्हाप्रमुख लक्ष्मण देशमुख, गणेश शिंदे, तालुकाप्रमुख संतोष देवकर, जगदीश पाटील गाढवे, उपतालुकाप्रमुख पांडुरंग गुजर, शहरप्रमुख जगन्नाथ देशमुख, तालुका संघटक प्रविण महाजन, नगराध्यक्ष वैभव देशमुख, माजी सभापती सोंडू पाटील, उपसभापती बालासाहेब पोले, माजी सभापती संतोष खोडके यांच्यासह राजू मोरे, बी. आर. नायक, गंगाराम फटांगळे, अजय पोले, हरिभाऊ काळे, संजय चिलगर, देविदास वाघ, माणिक देशमुख, गजानन नायकवाल, संतोष पोपळघट, संतोष गायकवाड, दत्ता कोरडे तसेच मोठ्या संख्येने शिवसैनिक, कार्यकर्ते व शेतकरी सहभागी झाले होते.

यावेळी पदाधिकाऱ्यांनी सांगितले की, निवडणुकीच्या काळात शेतकऱ्यांना दिलेल्या कर्जमाफीच्या आश्वासनाची अद्याप प्रभावी अंमलबजावणी झालेली नाही. नैसर्गिक संकटे, उत्पादन खर्चात वाढ आणि बाजारातील अनिश्चिततेमुळे शेतकरी आर्थिक अडचणीत सापडला आहे. अशा परिस्थितीत अपूर्ण आणि अटींच्या कर्जमाफीऐवजी सरसकट कर्जमाफी देणे ही काळाची गरज असल्याचे मत व्यक्त करण्यात आले. (ShivSena Tractor-Bullock Rally) शेतकऱ्यांच्या मागण्यांकडे सरकारने तात्काळ लक्ष द्यावे, अन्यथा यापुढे आणखी तीव्र आंदोलन छेडण्यात येईल, असा इशाराही संतप्त शिवसैनिकांनी दिला.