सावरगाव-कान्होबा धरणातील साचलेला गाळ उपसा करावा

गोरसेनेची जिल्हा वन प्रशासनाकडे मागणी

मानोरा (Savargaon-Kanhoba Dam) : वनपरिक्षेत्र अधिकारी कार्यकक्षेतील गिरोली वनवर्तुळात येणाऱ्या सावरगाव कान्होबा वनबीटातील धरणात गेल्या ३५ वर्षांपासून मोठ्या प्रमाणात गाळ साचला आहे. यामुळे धरणाची पाणी साठवण क्षमता कमी होऊन वन्यजीव व शेतकऱ्यांचे मोठे नुकसान होत आहे. गाळ काढण्यासाठी गोरसेनेने यापूर्वी दि. ०७ जून रोजी तहसीलदारांमार्फत व दि. ०६ जुलै रोजी वनपरिक्षेत्र अधिकारी, मानोरा यांना निवेदन दिले होते. मात्र ठोस कार्यवाही न झाल्याने अखेर गोरसेनेच्या वतीने पर्यावरण प्रेमी, सामाजिक कार्यकर्ते जगदीश कमलाबाई धांदू जाधव यांनी दि. १३ जुलै रोजी उपवनसंरक्षक (डिएफओ), वाशिम यांची भेट घेतली. व निवेदन दिले. 

 गोरसेनेच्यावतीने दिलेल्या निवेदनात नमूद केले आहे की, सावरगाव कान्होबा (Savargaon-Kanhoba Dam) वनबीटात राज्य शासनाकडून सुमारे ३५ वर्षांपूर्वी या जलप्रकल्पाची निर्मिती करण्यात आली आहे.  धरणाचा काही भाग वनक्षेत्रात येत असल्याचा दावा वनपरिक्षेत्र अधिकारी करतात. सध्या धरणात मोठ्या प्रमाणावर माती व गाळ साचल्याने पाणी साठवण क्षमता कमी झाली आहे. याचा फटका वन्यजीव व परिसरातील शेतकऱ्यांना बसत आहे.  "धरणात साचलेला गाळ पावसाळा संपल्यानंतर पाणी कमी झाल्यावर तात्काळ काढून खोलीकरण केल्यास वन्यजीवांना बारमाही पाणी उपलब्ध होईल, भूजल पातळीत वाढ होईल व शेजारील शेतजमिनीला सिंचनाचा लाभ मिळेल."  

गोरसेनेचे जिल्हा उपाध्यक्ष गोपाल कनीराम चव्हाण व तालुका अध्यक्ष सुनील मधुकर राठोड यांच्यावतीने पर्यावरण प्रेमी जाधव यांनी उपवनसंरक्षकांकडे मागणी केली की, स्थळ पाहणी करून तांत्रिक व प्रशासकीय उपाययोजना करावी.

या (Savargaon-Kanhoba Dam) संदर्भात गोरसेनेने दि. सात जून रोजी तहसीलदार, मानोरा यांच्यामार्फत व दि. ६ जुलै २०२६ रोजी प्रत्यक्ष वनपरिक्षेत्र अधिकारी, मानोरा यांना निवेदन देऊन गाळ उपसण्याची मागणी केली होती. परंतु आजतागायत कोणतीही ठोस कार्यवाही झालेली नाही, असा आरोप गोरसेनेने केला आहे. धरणातील गाळ न काढल्यास वन्यजीव पाण्यासाठी गावात शिरून मनुष्य-वन्यजीव संघर्ष वाढेल व शेतकऱ्यांवर पाणीटंचाईचे संकट ओढवेल. त्यामुळे वन विभागाने  यासंदर्भात शाश्वत उपाय योजना करावी, अन्यथा गोरसेनेला तीव्र आंदोलन छेडावे लागेल, असा इशारा देण्यात आला आहे. 

"सावरगांव कान्होबा धरणातील वर्षानुवर्षे साचलेली गाळ काढण्यासोबतच या वन बीटा संदर्भात करण्यात आलेल्या इतर तक्रारी व समस्यांसंदर्भात सुद्धा आवश्यक ती धोरणात्मक पावले वन प्रशासनाकडून उचलली जातील.
-उपवनसंरक्षक (डीएफओ) वाशिम, जी.आर.माधवराज