कन्हान येथे महिलांना स्वावलंबी बनविण्याच्या उद्देशाने आयोजित करण्यात आलेल्या लुगडी प्रशिक्षण शिबिराचा उत्साहपूर्ण वातावरणात समारोप झाला.
महिलांच्या कौशल्यविकास व स्वयंरोजगाराला चालना; १३ ते ३१ जुलैदरम्यान प्रशिक्षण शिबिराचे आयोजन
कन्हान : महाराष्ट्र कामगार कल्याण मंडळ, गट क्रमांक १, नागपूर अंतर्गत कामगार कल्याण केंद्र, कन्हान येथे महिलांना स्वावलंबी बनविण्याच्या उद्देशाने आयोजित करण्यात आलेल्या लुगडी प्रशिक्षण शिबिराचा उत्साहपूर्ण वातावरणात समारोप झाला. हे प्रशिक्षण शिबिर १३ जुलै २०२६ ते ३१ जुलै २०२६ या कालावधीत आयोजित करण्यात आले होते.
हा उपक्रम सहाय्यक कल्याण आयुक्त श्रीकांत धोत्रे यांच्या मार्गदर्शनाखाली तसेच कामगार कल्याण अधिकारी (गट क्रमांक १) श्री. छोटू जाधव यांच्या नेतृत्वाखाली यशस्वीपणे पार पडला. प्रशिक्षणादरम्यान महिलांना लुगडी तयार करण्याचे कौशल्य, त्यातील विविध तांत्रिक बाबी तसेच स्वयंरोजगाराच्या संधींबाबत मार्गदर्शन करण्यात आले.
समारोप कार्यक्रमाच्या अध्यक्षस्थानी कन्हानच्या नगरसेविका सौ. मनीषा चिखले या होत्या. प्रमुख पाहुण्या म्हणून सौ. दिशा पाटील (सामाजिक कार्यकर्त्या) तसेच सौ. पूजा सुगंधे उपस्थित होत्या. प्रशिक्षण शिबिराच्या प्रशिक्षिका सौ. स्नेहा राणे यांनी प्रशिक्षणार्थींना प्रत्यक्ष प्रात्यक्षिकांसह सविस्तर मार्गदर्शन केले. त्यांच्या मार्गदर्शनामुळे प्रशिक्षणार्थींमध्ये उत्साहाचे वातावरण निर्माण झाले.
कार्यक्रमाचे प्रभावी सूत्रसंचालन तसेच आभार प्रदर्शन पौणीकर मॅडम यांनी केले. शिबिराचे यशस्वी आयोजन करण्यासाठी सौ. प्रेमा कावळे यांनी विशेष सहकार्य केले.
या प्रशिक्षण शिबिरात सहभागी झालेल्या महिलांनी प्रशिक्षणातून मिळालेल्या कौशल्याचा उपयोग करून स्वयंरोजगाराच्या नव्या संधी निर्माण करण्याचा निर्धार व्यक्त केला. महाराष्ट्र कामगार कल्याण मंडळाच्या या उपक्रमामुळे महिलांच्या कौशल्यविकासाला चालना मिळाल्याबद्दल उपस्थितांनी समाधान व्यक्त केले.