पुणे जिल्हा परिषदेचे माजी अध्यक्ष जालिंदर कामटे यांचे निधन

पुणे (Jalinder Kamte) : पुणे जिल्हा परिषदेचे माजी अध्यक्ष आणि उपमुख्यमंत्री अजित पवार यांचे निकटवर्तीय म्हणून ओळखले जाणारे जालिंदर कामटे यांचे आज दुःखद निधन झाले. त्यांच्या निधनाने पुणे जिल्ह्यातील राजकीय आणि सामाजिक क्षेत्रात शोककळा पसरली आहे.

मिळालेल्या माहितीनुसार, काल सायंकाळी जेवणानंतर ते आपल्या खोलीत विश्रांतीसाठी गेले होते. दररोजप्रमाणे सकाळी सहा वाजता मॉर्निंग वॉकसाठी न उठल्याने कुटुंबीयांना संशय आला. त्यानंतर सकाळी सुमारे नऊच्या सुमारास दरवाजा तोडून त्यांना बाहेर काढण्यात आले आणि तातडीने रुबी हॉल क्लिनिक येथे उपचारासाठी दाखल करण्यात आले. मात्र डॉक्टरांनी त्यांना मृत घोषित केले.

प्राथमिक माहितीनुसार, हृदयविकाराच्या झटक्याने त्यांचा मृत्यू झाला असावा असा अंदाज व्यक्त करण्यात येत आहे.

सायंकाळी अंत्यसंस्कार

जालिंदर कामटे यांच्यावर आज सायंकाळी कोंडवा स्मशानभूमी येथे अंत्यसंस्कार करण्यात येणार आहेत. हवेली तालुक्यातील कोंढवा हे त्यांचे मूळ गाव होते.

राजकीय आणि सामाजिक कारकीर्द

जालिंदर कामटे यांनी १९९९ ते २००२ या कालावधीत पुणे जिल्हा परिषदेचे अध्यक्ष म्हणून काम पाहिले. विद्यार्थी चळवळीतून त्यांनी आपल्या सार्वजनिक जीवनाची सुरुवात केली आणि पुढे युवक काँग्रेसच्या माध्यमातून सक्रिय राजकारणात प्रवेश केला.

धडाडीचे कार्यकर्ते म्हणून त्यांची संपूर्ण पुणे जिल्ह्यात ओळख होती. पुणे शहरातील विविध विद्यार्थी आंदोलनांमध्ये तसेच सावित्रीबाई फुले पुणे विद्यापीठ परिसरातील अनेक चळवळींमध्ये त्यांनी सक्रिय भूमिका बजावली होती.