निवृत्तीनंतर मिळालेल्या आयुष्यभराच्या कमाईवर डोळा ठेवत सख्ख्या पुतणीनेच आपल्या ७२ वर्षीय काकाची तब्बल ४५ लाख १५ हजार रुपयांची फसवणूक केल्याचा धक्कादायक प्रकार समोर आला आहे.
छत्रपती संभाजीनगर (Investment Scam) : निवृत्तीनंतर मिळालेल्या आयुष्यभराच्या कमाईवर डोळा ठेवत सख्ख्या पुतणीनेच आपल्या ७२ वर्षीय काकाची तब्बल ४५ लाख १५ हजार रुपयांची फसवणूक केल्याचा धक्कादायक प्रकार समोर आला आहे. पैशांवर अल्पावधीत दुप्पट-तिप्पट परतावा मिळवून देण्याचे आमिष दाखवत ही रक्कम विविध खात्यांमध्ये वर्ग करण्यात आल्याचा आरोप असून, या प्रकरणी मुख्य सूत्रधार पुतणीसह एकूण १३ जणांविरोधात जवाहरनगर पोलीस ठाण्यात गुन्हा दाखल करण्यात आला आहे.
या प्रकरणातील मुख्य संशयित कल्याणी रमेश ढोरे (सध्या रा. पिंपरी-चिंचवड, पुणे) हिच्यासह सुमित कदम, क्रिस्टीना, कविता, राजू, वनलानुन्थरी, आशिष वाणी, अदैल्लु, मोहम्मद सिराजोद्दीन, इस्माइल न्युमो, नरेश कटारिया, रेहान खान आणि इम्रान अली या अन्य १२ जणांची नावे गुन्ह्यात नमूद करण्यात आली आहेत.
तक्रारदार श्रीकृष्ण आनंदराव ढोरे (वय ७२, रा. सुमंगल विहार, गारखेडा) हे २०१४ मध्ये शासकीय सेवेतून निवृत्त झाले होते. निवृत्तीनंतर त्यांना सुमारे ४५ लाख रुपयांचा निधी मिळाला होता. ही बाब लक्षात घेत कल्याणी ढोरे हिने त्यांच्याशी विश्वासाचे नाते अधिक दृढ करत, बँकेतील मुदत ठेवींपेक्षा इतरत्र गुंतवणूक केल्यास एका वर्षात दुप्पट-तिप्पट परतावा मिळेल, असे सांगून त्यांची दिशाभूल केल्याचा आरोप आहे.
विश्वास निर्माण करण्यासाठी कल्याणीने काकाला उत्तर प्रदेशातील लखनौ येथे नेल्याचे तपासात समोर आले आहे. तेथे आयोजित करण्यात आलेल्या 'इंडियाज बिझनेस कॉन्क्लेव्ह' या व्यावसायिक कार्यक्रमात सहभागी करून घेतल्याने तक्रारदारांचा तिच्यावर पूर्ण विश्वास बसला.
लखनौहून परतल्यानंतर कल्याणीने श्रीकृष्ण ढोरे यांना बँकेत नेऊन काही कोऱ्या धनादेशांवर (Blank Cheques) स्वाक्षऱ्या घेतल्या. त्यानंतर स्वतः RTGS आणि NEFT व्यवहारांच्या स्लिप्स भरून तक्रारदारांच्या खात्यातील ४५ लाख १५ हजार रुपये तिच्या ओळखीच्या १२ वेगवेगळ्या व्यक्तींच्या बँक खात्यांमध्ये वर्ग केल्याचा आरोप फिर्यादीत करण्यात आला आहे.
गुंतवणुकीनंतर सुमारे सहा महिन्यांनी श्रीकृष्ण ढोरे यांनी परताव्याबाबत विचारणा केली असता, कल्याणीने त्यांना WhatsApp वर ६८ लाख रुपयांच्या सिटी बँकेच्या चेकचा फोटो पाठवला. मात्र, काही वेळातच तो संदेश 'Delete for Everyone' करून हटवण्यात आला. यामुळे संशय बळावल्याने त्यांनी बँकेत चौकशी केली असता, त्यांच्या खात्यातील मोठी रक्कम विविध खात्यांमध्ये वर्ग झाल्याचे उघड झाले.
फसवणुकीची खात्री झाल्यानंतर श्रीकृष्ण ढोरे यांनी जवाहरनगर पोलीस ठाण्यात तक्रार दाखल केली. त्यानुसार पोलिसांनी मुख्य संशयित कल्याणी ढोरेसह एकूण १३ जणांविरोधात फसवणुकीचा गुन्हा नोंदवून पुढील तपास सुरू केला आहे. या आर्थिक गैरव्यवहारामुळे परिसरात मोठी खळबळ उडाली असून, सर्व आरोपींचा शोध पोलीस घेत आहेत.