सेवाग्राम स्थानकावर विशेष ट्रॅफिक ब्लॉक; काही गाड्या रद्द, काहींचे थांबे बंद

वर्धा (Indian Railways) : मध्य रेल्वेच्या नागपूर विभागात नागपूर–सेवाग्राम दरम्यान तिसरी व चौथी रेल्वे लाईनच्या कामाअंतर्गत सेवाग्राम स्थानकावर इलेक्ट्रॉनिक इंटरलॉकिंग (EI) प्रणाली व यार्ड रिमॉडेलिंगचे काम हाती घेण्यात आले आहे. यासाठी ३० मे ते ६ जून २०२६ दरम्यान विशेष ट्रॅफिक व पॉवर ब्लॉक घेण्यात येणार असून या कालावधीत काही रेल्वे गाड्या रद्द, शॉर्ट टर्मिनेट तसेच काही गाड्यांचे थांबे रद्द राहणार आहेत.

६ जून रोजी गाडी क्रमांक 61109 वर्धा–नागपूर मेमू, 61110 नागपूर–वर्धा मेमू, 12219 अमरावती–अजनी एक्सप्रेस आणि 12120 अजनी–अमरावती एक्सप्रेस या गाड्या पूर्णतः रद्द राहतील. तसेच 12810 हावडा–छत्रपती शिवाजी महाराज टर्मिनस एक्सप्रेस आणि 61110 नागपूर–वर्धा मेमू या गाड्यांचा सेवाग्राम स्थानकावरील थांबा ३० मे ते ६ जूनदरम्यान रद्द करण्यात आला आहे.

नागपूर स्थानकावरील प्लॅटफॉर्म क्रमांक २ बंद असल्यामुळे कोचिंग परिचालनावरील परिणामाचा कालावधी ५२ दिवसांवरून ६१ दिवसांपर्यंत वाढविण्यात आला आहे. त्यामुळे ३० मे ते ७ जूनदरम्यान अतिरिक्त नऊ दिवस रेल्वे वाहतुकीवर परिणाम राहणार आहे. दरम्यान, 11203 नागपूर–मडगाव एक्सप्रेस ही ३० मे ते ६ जूनदरम्यान अजनी स्थानकावर शॉर्ट टर्मिनेट करण्यात येईल. तर 11204 मडगाव–नागपूर एक्सप्रेस ही ३१ मे ते ७ जूनदरम्यान अजनी स्थानकावरूनच सुटणार आहे. मध्य रेल्वे नागपूर विभागाने प्रवाशांना प्रवासापूर्वी संबंधित गाड्यांची अद्ययावत माहिती तपासूनच प्रवास करण्याचे आवाहन केले आहे.