Hingoli Risala Bazaar: हिंगोलीतील रिसाला बाजारातील 535 मालमत्ताधारकांना प्रशासनाने मालकी हक्कावर नोटीस देऊन कायदेशीर पुरावे सादर करण्याचा आदेश दिला आहे.
हिंगोली (Hingoli Risala Bazaar) : हिंगोली शहराच्या मध्यवर्ती भागातील रिसाला बाजार परिसरात एकच खळबळ उडाली आहे. येथील 535 मालमत्ताधारकांच्या मालकी हक्कावरच प्रशासनाने थेट प्रश्नचिन्ह उपस्थित केले आहे. उपविभागीय अधिकारी समाधान घुटूकडे यांनी या सर्व मालमत्ताधार कांना नोटीस बजावून आपल्या मालकीचे कायदेशीर पुरावे सादर करण्याचे कडक आदेश दिले आहेत.
गेल्या काही महिन्यांपासून रिसाला बाजार परिसरातील (Hingoli Risala Bazaar) जमिनींच्या मालकीबाबत अनेक तक्रारी प्रशासनाकडे येत होत्या. काही ठिकाणी बनावट कागदपत्रांच्या आधारे व्यवहार झाल्याच्या तसेच अनधिकृत बांधकामे वाढल्याच्या तक्रारी होत्या. या सर्व पार्श्वभूमीवर उपविभागीय अधिकारी समाधान घुटूकडे यांनी थेट कारवाईचा बडगा उगारला आहे. नोटीस मिळाल्यानंतर परिसरातील मालमत्ताधारकांमध्ये चिंतेचे वातावरण पसरले आहे. 7/12 उतारा, खरेदीखत, नगरपालिकेच्या कर पावत्या आणि एनए आदेश यांसारखी कागदपत्रे गोळा करण्यासाठी नागरिकांची उपविभागीय कार्यालयात एकच गर्दी होत आहे.
प्रशासनाने स्पष्ट केले आहे की, दिलेल्या मुदतीत पुरावे सादर न करणाऱ्या किंवा सादर केलेल्या कागदपत्रांमध्ये त्रुटी आढळणाऱ्या मालमत्तांवर नियमानुसार कायदेशीर कारवाई केली जाईल. या कारवाईमुळे अतिक्रमण आणि बेकायदेशीर व्यवहारांना आळा बसेल, असा विश्वास प्रशासनाने व्यक्त केला आहे. दरम्यान, रिसाला बाजारातील या (Hingoli Risala Bazaar) कारवाईनंतर हिंगोली शहरातील इतर भागातील मालमत्ताधारकांचेही धाबे दणाणले आहेत.