पुणे जिल्ह्यात विषारी हातभट्टीदारू सेवनामुळे झालेल्या दुर्घटनेनंतर राज्यभरात अवैध मद्यनिर्मिती व विक्रीविरोधात विशेष मोहीम राबवली जात आहे.
हिंगोली (Hingoli Excise Department) : पुणे जिल्ह्यात विषारी हातभट्टीदारू सेवनामुळे झालेल्या दुर्घटनेनंतर राज्यभरात अवैध मद्यनिर्मिती व विक्रीविरोधात विशेष मोहीम राबवली जात आहे. याच पार्श्वभूमीवर हिंगोली जिल्हाधिकारी राहुल गुप्ता यांच्या सूचनेनुसार व राज्य उत्पादन शुल्क अधीक्षक आदित्य गो. पवार यांच्या मार्गदर्शनाखाली जिल्ह्यात 29 मे ते 5 जून या कालावधीत व्यापक मोहीम राबवण्यात आली.
राज्य उत्पादन शुल्क हिंगोली विभागाने या मोहिमेदरम्यान संपूर्ण जिल्ह्यात छापे टाकून अवैध मद्य विक्री, वाहतूक तसेच गावठी दारू निर्मिती अड्ड्यांवर कारवाई केली. या कारवाईत महाराष्ट्र दारुबंदी कायदा 1949 अंतर्गत 37 आरोपींविरुद्ध गुन्हे नोंदवण्यात आले आहेत.
कारवाईदरम्यान देशी मद्याच्या 180 मिलीच्या 444 बाटल्या, हातभट्टी दारू 154.5 लिटर, रसायन 660 लिटर व 3 दुचाकी वाहने असा एकूण 2,41,810 रुपये किमतीचा मुद्देमाल जप्त करण्यात आला.
ही मोहीम अधीक्षक आदित्य पवार यांच्या मार्गदर्शनाखाली निरीक्षक मोहन मातकर, भरारी पथक निरीक्षक रमेश चाटे, दुय्यम निरीक्षक टी.बी. शेख, कृष्णकांत पुरी, प्रदिप गोणारकर, ज्योती गुट्टे, स.दु.नि. कांबळे, जवान आडे, राठोड, चव्हाण, दिनेश राठोड, टेके, वाहनचालक वाघमारे व इतर कर्मचाऱ्यांनी पार पाडली.
राज्य उत्पादन शुल्क विभागाने नागरिकांना आवाहन केले आहे की, कोणीही अवैध मद्य खरेदी करू नये. तसेच हिंगोली जिल्ह्यात अवैध मद्य, बनावट मद्य, गावठी दारू निर्मिती अड्डे किंवा विक्रीची माहिती असल्यास विभागाशी संपर्क साधावा. यासाठी 02456-220106, टोल फ्री क्रमांक 18002339999 व व्हॉट्सअॅप क्रमांक 8422001133 वर माहिती देता येईल.