मुंबईत हाय-प्रोफाईल देहव्यापार रॅकेटचा पर्दाफाश; मराठीतील प्रसिद्ध अभिनेत्रींसह दोघींची सुटका, मेकअप आर्टिस्ट दलाल अटकेत

गिरगावातील हॉटेलवर मुंबई पोलिसांची धाड; बनावट ग्राहकाच्या मदतीने कारवाई, आर्थिक व्यवहारांसह हॉटेल व्यवस्थापनाचीही चौकशी

मुंबई (High Profile Sex Racket) : गिरगाव परिसरातील एका हॉटेलमध्ये सुरू असलेल्या हाय-प्रोफाईल देहव्यापार रॅकेटवर मुंबई पोलिसांनी धाड टाकत मोठी कारवाई केली. या कारवाईत दोन अभिनेत्रींची सुटका करण्यात आली असून, त्यापैकी एक अभिनेत्री मराठी चित्रपटसृष्टीतील आघाडीची कलाकार आहे. तर दुसरी अभिनेत्री बंगाली आणि हिंदी चित्रपटांमध्ये छोट्या तसेच कॅमिओ भूमिकांमधून झळकली आहे. या प्रकरणात एका दलालाला अटक करण्यात आली असून, तो सेलिब्रिटींसोबत काम करणारा मेकअप आर्टिस्ट असल्याची माहिती पोलिसांनी दिली आहे.

मुंबई पोलिसांना गिरगावातील संबंधित हॉटेलमध्ये देहव्यापार सुरू असल्याची माहिती मिळाल्यानंतर त्यांनी कारवाईची योजना आखली. या बेकायदेशीर प्रकाराची खात्री करण्यासाठी प्रथम एका बनावट ग्राहकाला हॉटेलमध्ये पाठविण्यात आले. माहितीची पुष्टी झाल्यानंतर पोलिसांनी तातडीने छापा टाकून दोन महिलांची सुटका केली.

कारवाईदरम्यान पोलिसांनी एका संशयित दलालाला रंगेहाथ अटक केली. प्राथमिक तपासात तो मनोरंजन क्षेत्रातील सेलिब्रिटींसोबत काम करणारा मेकअप आर्टिस्ट असल्याचे समोर आले आहे. या प्रकरणातील आर्थिक व्यवहार, संबंधित व्यक्तींची भूमिका तसेच हॉटेल व्यवस्थापनाचा सहभाग होता का, याचा तपास गुन्हे शाखेकडून सुरू आहे.

मुंबई पोलिसांनी अधिकृत निवेदनात सांगितले की, सुटका करण्यात आलेल्या महिलांची ओळख गोपनीय ठेवण्यात आली आहे. तपासादरम्यान त्यांना देहव्यापार करण्यास भाग पाडले जात असल्याचे समोर आले असून, ग्राहकांकडून मोठ्या प्रमाणात पैसे उकळले जात असल्याची माहितीही पोलिसांनी दिली आहे.

या प्रकरणाचा तपास सुरू असून, पुढील चौकशीत आणखी महत्त्वाची माहिती समोर येण्याची शक्यता असल्याचे मुंबई पोलिसांनी स्पष्ट केले आहे.