कळमनुरी पोलिसांनी शहराजवळील बायपास परिसरातील एका जुगार अड्ड्यावर धाड टाकून 10 जणांविरुद्ध कारवाई केली.
कळमनुरी : कळमनुरी पोलिसांनी शहराजवळील बायपास परिसरातील एका जुगार अड्ड्यावर धाड टाकून 10 जणांविरुद्ध कारवाई केली. या कारवाईत रोख रक्कम, दोन मोटारसायकली आणि जुगाराचे साहित्य असा एकूण 1 लाख 49 हजार 160 रुपयांचा मुद्देमाल जप्त करण्यात आला.
पोलिसांनी दिलेल्या माहितीनुसार, दि. 29 जुलै 2026 रोजी सायंकाळी 5 वाजण्याच्या सुमारास हिंगोली-नांदेड रोडवरील कळमनुरी बायपास परिसरात बबन शिंदे यांच्या शेतातील टिनपत्राच्या शेडमध्ये काही जण 'झन्ना-मन्ना' नावाचा पत्त्यांचा जुगार खेळत असल्याची माहिती पोलिसांना मिळाली. त्यानंतर पोलीस निरीक्षक जमीर नाईक यांच्या मार्गदर्शनाखाली पोलिसांनी छापा टाकला.
या कारवाईत शेख मोबीन, जफ्फर खाँ, शेख आवेश, जुनेदखाँन, शिवाजी गाभणे, श्याम माखाणे, अंबादास सातव, डिंगाबर जावळे, श्याम सोळंके आणि अमोल ठाकूर यांच्याविरुद्ध कारवाई करण्यात आली.
आरोपींकडून रोख रक्कम, 52 पत्ते, एक स्प्लेंडर प्लस मोटारसायकल, एक विना नंबरची एचएफ डिलक्स मोटारसायकल असा एकूण 1,49,160 रुपयांचा मुद्देमाल जप्त करण्यात आला.
याप्रकरणी पोलीस स्टेशन कळमनुरी येथे महाराष्ट्र जुगार प्रतिबंधक कायद्यानुसार कलम 12(अ) अंतर्गत गुन्हा दाखल करण्यात आला असून पुढील तपास पोलीस हवालदार दिलीप पोळे करीत आहेत.