नागपूर ग्रामीण पोलिसांच्या स्थानिक गुन्हे शाखेने (एलसीबी) कन्हान पोलीस ठाण्याच्या हद्दीतील टेकाडी परिसरात सुरू असलेल्या जुगार अड्ड्यावर धाड टाकून सात जणांना रंगेहाथ पकडले.
मोबाईल, दुचाकीसह २.१० लाख रुपयांचा मुद्देमाल जप्त
कन्हान (Gambling Den Raid) : नागपूर ग्रामीण पोलिसांच्या स्थानिक गुन्हे शाखेने (एलसीबी) कन्हान पोलीस ठाण्याच्या हद्दीतील टेकाडी परिसरात सुरू असलेल्या जुगार अड्ड्यावर धाड टाकून सात जणांना रंगेहाथ पकडले. या कारवाईत रोख रक्कम, मोबाईल, दुचाकी वाहन आणि जुगाराचे साहित्य असा एकूण २ लाख १० हजार ९५० रुपयांचा मुद्देमाल जप्त करण्यात आला आहे.
मिळालेल्या माहितीनुसार, गुरुवार (११ जून) रोजी नागपूर ग्रामीणचे वरिष्ठ पोलीस अधीक्षक हर्ष ए. पोद्दार यांच्या मार्गदर्शनाखाली स्थानिक गुन्हे शाखेच्या पथकाने कन्हान पोलिसांसह संयुक्त कारवाई केली. टेकाडी शिवारातील कोळसा खदान क्रमांक ६ परिसरातील झाडीझुडपांमध्ये अवैधरित्या जुगार सुरू असल्याची माहिती पोलिसांना मिळाली होती.
या माहितीच्या आधारे पोलिसांनी घटनास्थळी छापा टाकला. त्यावेळी सात आरोपी ५२ ताशपत्त्यांच्या साहाय्याने जुगार खेळताना आढळून आले. पोलिसांनी तत्काळ कारवाई करून सर्वांना ताब्यात घेतले.
कारवाईदरम्यान विजय केवलदास गेडाम (४०), मोहसिन मोविन शेख (३५), निलेश मुनेश नानेट (४०), मोबीदउर रहमान अब्दुल रशीद (३०), सुरज रघुवीर मेश्राम (३५), शारुख खान शमशेर खान (३०) आणि सचिन प्रकाश यादव (३९) या सात आरोपींना अटक करण्यात आली.
पंचांसमक्ष करण्यात आलेल्या जप्ती कारवाईत ५२ ताशपत्ते, ४० हजार ६०० रुपयांची रोख रक्कम, हिरो होंडा स्प्लेंडर दुचाकी (एमएच-३१-एयू-८५९२), मोबाईल फोन, एलईडी लाईट, दरी तसेच इतर साहित्य जप्त करण्यात आले. जप्त मुद्देमालाची एकूण किंमत २ लाख १० हजार ९५० रुपये असल्याचे पोलिसांनी सांगितले.
या प्रकरणी संबंधित सात आरोपींविरुद्ध जुगार प्रतिबंधक कायद्यान्वये गुन्हा दाखल करण्यात आला असून पुढील तपास कन्हान पोलीस करीत आहेत.