अमळनेर-धुळे महामार्गावरील मंगरूळ गावाजवळ सोमवारी सकाळी भीषण तिहेरी अपघात झाला.
अमळनेर (Engagement Tragedy) : अमळनेर-धुळे महामार्गावरील मंगरूळ गावाजवळ सोमवारी सकाळी भीषण तिहेरी अपघात झाला. कार, मोटरसायकल आणि एसटी बस यांच्यात झालेल्या या भीषण धडकेत सहा जणांचा जागीच मृत्यू झाला. या दुर्घटनेमुळे परिसरात शोककळा पसरली असून संबंधित वाहनांचे मोठ्या प्रमाणात नुकसान झाले आहे.
अपघात नेमका कसा घडला?
मिळालेल्या माहितीनुसार, सोमवारी सकाळी सुमारे ७ वाजण्याच्या सुमारास मंगरूळ गावाजवळील हॉटेल वृंदावन परिसरात हा अपघात घडला. अमळनेरहून धुळ्याकडे जाणारी मोटरसायकल (क्रमांक MH-18 C-8719) आणि एसटी बस (क्रमांक MH-13 CU-7540) मार्गस्थ होत्या. त्याचवेळी धुळ्याकडून येणाऱ्या भरधाव कारने (क्रमांक GJ-19 AF-3147) चालकाचे नियंत्रण सुटल्याने समोरून येणाऱ्या एसटी बस आणि मोटरसायकलला जोरदार धडक दिली.
साखरपुड्याच्या कार्यक्रमासाठी निघालेल्या कुटुंबावर काळाचा घाला
या भीषण अपघातात मोटरसायकलचा पूर्णपणे चेंदामेंदा झाला असून धरणगाव येथील मोटरसायकलस्वाराचा जागीच मृत्यू झाला.
दरम्यान, कारमधील पाच प्रवाशांचाही घटनास्थळीच मृत्यू झाला. हे सर्वजण गुजरातमधील व्यारा येथील एकाच कुटुंबातील असल्याची माहिती मिळाली आहे. ते अमळनेर येथे आयोजित साखरपुड्याच्या कार्यक्रमासाठी येत होते. मात्र, नियतीने त्यांच्यावर दुर्दैवी घाला घातला.
मृतांची नावे
- आदित्य चंद्रकांत महाजन
- अनिता सुरेश महाजन
- निर्मला नंदलाल महाजन
- नंदलाल गोपाल महाजन
- सुरेश विक्रम महाजन
लहान मुलाला मिळाले जीवदान
अपघातानंतर कारचा अक्षरशः चक्काचूर झाला होता. कारमध्ये अडकलेल्या एका लहान मुलाला स्थानिक ग्रामस्थ, पोलीस आणि एसटी कर्मचाऱ्यांच्या मदतीने सुखरूप बाहेर काढण्यात आले. या दुर्घटनेत एसटी बसमधील दीपक दिलीप पाटील हे प्रवासी जखमी झाले असून त्यांच्यावर उपचार सुरू आहेत.
पोलीस आणि आपत्कालीन यंत्रणेची तत्परता
अपघाताची माहिती मिळताच '११२' आपत्कालीन सेवेच्या माध्यमातून पोलीस पथक तात्काळ घटनास्थळी दाखल झाले. पोलीस निरीक्षक दत्तात्रय निकम, हेडकॉन्स्टेबल कैलास शिंदे, रवी पाटील तसेच पोलीस पाटील भागवत पाटील यांनी तत्काळ मदतकार्य हाती घेतले. जखमींना '१०८' रुग्णवाहिकेच्या साहाय्याने रुग्णालयात दाखल करण्यात आले.
या भीषण अपघातामुळे काही काळ महामार्गावरील वाहतूक विस्कळीत झाली होती. घटनास्थळी नागरिकांनी मोठी गर्दी केली होती. पोलिसांनी मृतदेह शवविच्छेदनासाठी ग्रामीण रुग्णालयात पाठवले असून प्रकरणाचा पुढील तपास सुरू आहे.