शेळीसाठी पाला आणताना झाडावरच शॉक लागून एकाचा मृत्यू; फांदी मेन लाईनला लागल्याने दुर्दैवी घटना

चाकूर (Electrocution Death) : लातूर जिल्ह्यातील चाकूर तालुक्यातील झरी बुद्रुक येथे शेळीसाठी पाला आणण्यासाठी झाडावर चढून फांदी तोडत असताना ती फांदी सब स्टेशनला गेलेल्या मेन लाईनवरील विद्युत तारेवर पडल्याने शॉक लागून एका व्यक्तीचा जागीच मृत्यू झाल्याची दुर्दैवी घटना शुक्रवारी सकाळी सुमारे ७ वाजता घडली.

मृत व्यक्तीचे नाव अशोक बाबुराव जाधव (वय ४२) असे आहे. ते शुक्रवारी सकाळी शेळ्यांसाठी पाला आणण्यासाठी गावाजवळील एका झाडावर चढून फांदी तोडत होते. यावेळी तोडलेली फांदी सब स्टेशनला गेलेल्या मेन लाईनवर पडल्याने ओल्या फांदीतून विद्युत प्रवाह प्रवाहित झाला आणि त्यांना जोराचा शॉक बसला. या दुर्घटनेत त्यांचा झाडावरच मृत्यू झाला. काही वेळ त्यांचा मृतदेह झाडावरच लटकलेल्या अवस्थेत होता.

अशोक जाधव हे वडार समाजातील गरीब कुटुंबातील होते. त्यांच्या निधनामुळे परिसरात हळहळ व्यक्त होत आहे.

अशोक जाधव यांच्या पश्चात आई-वडील, पत्नी, दोन मुली आणि एक मुलगा असा परिवार आहे. त्यांच्या चार अपत्यांपैकी तीन मुले मूकबधिर असल्याने कुटुंबाची जबाबदारी त्यांच्यावरच होती. घरातील कर्ता पुरुष गमावल्याने कुटुंबावर दुःखाचा डोंगर कोसळला असून, या कुटुंबाला शासनाने आर्थिक मदत द्यावी, अशी मागणी समाजबांधवांकडून करण्यात येत आहे.