चिखलीतील RTE प्रवेशांची जिओ-टॅगिंगद्वारे चौकशी करण्याची मागणी

चिखली (Chikhali RTE Admission) : शिक्षण हक्क कायदा (RTE) अंतर्गत चिखली शहरातील विविध शाळांमध्ये झालेल्या प्रवेश प्रक्रियेची जिओ-टॅगिंगच्या माध्यमातून सखोल चौकशी करून अपात्र लाभार्थींवर कठोर कारवाई करावी, अशी मागणी सामाजिक कार्यकर्ते विजयसिंग खरे यांनी जिल्हाधिकारी, बुलढाणा यांच्याकडे निवेदनाद्वारे केली आहे. खरे यांनी दिलेल्या निवेदनात नमूद केले आहे की, RTE अंतर्गत झालेल्या काही प्रवेशांमध्ये अर्जदारांनी सादर केलेले पत्ते आणि प्रत्यक्ष वास्तव्यातील पत्ते यामध्ये तफावत असल्याच्या तक्रारी प्राप्त होत आहेत. तसेच आर्थिकदृष्ट्या सक्षम, शासकीय, निमशासकीय तसेच खाजगी क्षेत्रात नियमित नोकरी करणाऱ्या काही पालकांनीही या योजनेचा लाभ घेतल्याची चर्चा नागरिकांमध्ये सुरू आहे. त्यामुळे खऱ्या अर्थाने पात्र असलेल्या गरीब व गरजू विद्यार्थ्यांवर अन्याय होत असल्याची भावना व्यक्त केली जात आहे.

या (Chikhali RTE Admission) पार्श्वभूमीवर चिखली शहरातील RTE अंतर्गत प्रवेश घेतलेल्या विद्यार्थ्यांच्या पालकांच्या पत्त्यांची जिओ-टॅगिंगद्वारे पडताळणी करण्यात यावी, उत्पन्न प्रमाणपत्रे व इतर कागदपत्रांची फेरतपासणी करण्यात यावी, तसेच चौकशीत अपात्र लाभार्थी आढळल्यास त्यांच्यावर नियमानुसार कठोर कारवाई करण्यात यावी, अशी मागणी निवेदनातून करण्यात आली आहे. शासनाने आर्थिकदृष्ट्या दुर्बल व वंचित घटकांतील विद्यार्थ्यांना दर्जेदार शिक्षणाची संधी उपलब्ध करून देण्यासाठी RTE योजना सुरू केली आहे. त्यामुळे योजनेचा गैरवापर रोखून पात्र विद्यार्थ्यांना न्याय मिळवून देण्यासाठी प्रशासनाने तातडीने चौकशी करावी, असेही निवेदनात नमूद करण्यात आले आहे.

सदर प्रकरणाची सखोल चौकशी करून संबंधित विभागांना आवश्यक निर्देश देण्याची विनंती जिल्हाधिकाऱ्यांकडे करण्यात आली. निवेदन देताना विजयसिंग खरे यांच्यासमवेत सिद्धेश्वरजी ठेग उपस्थित होते.