चिखली जालना रोडवर बुलेटचा अपघात एक ठार दोन जखमी

चिखली (Chikhli Accident) : चिखली येथून लग्न समारंभासाठी जात असताना बुलेट स्वराचा अंचरवाडी ते अंढेरा फाटा दरम्यान वळणावर भीषण अपघात झाला. या दुर्घटनेत एकाचा मृत्यू झाला असून दोन जण गंभीर जखमी झाले आहेत. अपघातानंतर जखमींना तातडीने चिखली येथील जवंजाळ हॉस्पिटलमध्ये दाखल करण्यात आले. मात्र डॉक्टरांनी ओम संजय जामदार यांना मृत घोषित केले. या घटनेनंतर नातेवाईकांनी रुग्णालयात मोठा आक्रोश केला.

मिळालेल्या माहितीनुसार, ओम संजय जामदार (28), जय सुनिल जामदार (22) आणि अभिजित प्रमोद भवर (25, रा. आदर्श शाळेजवळ, चिखली) हे तिघे दिनांक 30 एप्रिल 2026 रोजी लग्न समारंभासाठी बुलेटवर जात असताना अंचरवाडी ते अंढेरा फाटा दरम्यान असलेल्या वळणावर त्यांचा अपघात झाला. या अपघातात तिघेही जखमी झाले.

जखमींना तातडीने जवंजाळ हॉस्पिटलमध्ये दाखल करण्यात आले. मात्र उपचारादरम्यान ओम संजय जामदार यांचा मृत्यू झाला, तर जय सुनील जामदार आणि अभिजित प्रमोद भवर यांच्यावर उपचार सुरू असून त्यांची प्रकृती स्थिर असल्याची माहिती डॉक्टरांनी दिली आहे.

मृत ओम जामदार हे चिखली अर्बन बँकेचे अधिकारी संजय जामदार यांचे पुत्र आहेत. घटनेची माहिती मिळताच नातेवाईकांनी तातडीने हॉस्पिटलमध्ये धाव घेतली. ओम यांचा मृतदेह पाहताच कुटुंबीयांनी हंबरडा फोडला. परिसरात शोककळा पसरली.

या घटनेची माहिती मिळताच चिखली अर्बन बँकेचे माजी अध्यक्ष तथा संचालक सतीश गुप्त, अध्यक्ष असंतोष गुप्त, नगराध्यक्ष पंडितराव देशमुख, नगरसेवक सुरेंद्र ठाकूर यांनी रुग्णालयात भेट देऊन कुटुंबीयांना धीर दिला. या वेळी परिसरात मोठी गर्दी जमली होती.