चामोर्शी तालुक्यातील घोट ही तालुक्यातील सर्वात मोठ्या ग्रामपंचायतींपैकी एक असून येथील लोकसंख्या अंदाजे १२ हजारांच्या घरात आहे.
सामाजिक कार्यकर्ते संजय वडेट्टीवार यांची मागणी
घोट (Chamorshi Taluka) : चामोर्शी तालुक्यातील घोट ही तालुक्यातील सर्वात मोठ्या ग्रामपंचायतींपैकी एक असून येथील लोकसंख्या अंदाजे १२ हजारांच्या घरात आहे. वाढती लोकसंख्या, शासकीय कार्यालयांची उपलब्धता, शैक्षणिक संस्था, व्यापारी बाजारपेठ तसेच प्रशासकीय दृष्टीने वाढते महत्त्व लक्षात घेता घोट ग्रामपंचायतीला नगरपंचायतीचा दर्जा देण्यात यावा, अशी मागणी सामाजिक कार्यकर्ते संजय वडेट्टीवार यांनी केली आहे.
घोट हे स्वातंत्र्यवीर वीर बाबुराव शेडमाके यांची पावनभूमी म्हणून ओळखले जाते. घोट गडावरील त्यांच्या ऐतिहासिक वारशामुळेही घोटचे वेगळे महत्त्व आहे. परिसरात आदिवासी बांधवांची मोठी लोकसंख्या असून हा भाग अद्यापही विकासाच्या मुख्य प्रवाहापासून काही प्रमाणात दूर आहे.
घोट येथे केंद्रीय जवाहर नवोदय विद्यालय, पोलीस स्टेशन, आदिवासी विकास महामंडळाचे उपप्रादेशिक कार्यालय, राजस्व मंडळ कार्यालय, महाराष्ट्र राज्य विद्युत मंडळाचे ३३ केव्ही कार्यालय, बँक ऑफ महाराष्ट्र, सहकारी बँक शाखा आदी महत्त्वाची कार्यालये कार्यरत आहेत.
याशिवाय दिना प्रकल्प कार्यालय, सिंचन विभाग कार्यालय, वनपरिक्षेत्र कार्यालय, जैवविविधता उद्यान, जिल्हा परिषद कनिष्ठ विज्ञान महाविद्यालय, प्राथमिक आरोग्य केंद्र, भारतीय डाक विभाग, मराठी केंद्र शाळा, आदिवासी मुलांचे वसतिगृह, परमपूज्य महाविद्यालय कॉन्व्हेंट, लोकमंगल संस्था तसेच नवोदय प्रायमरी कॉन्व्हेंट यांसारख्या शैक्षणिक व सामाजिक संस्था येथे आहेत.
घोट ग्रामपंचायतीपासून अवघ्या दोन किलोमीटर अंतरावर सिमुलतला व वरूर या ग्रामपंचायतींचा परिसर जोडलेला असून घोट हे केंद्रस्थानी व्यापारी बाजारपेठ म्हणून विकसित झाले आहे. धान गिरण्या, विविध व्यापारी आस्थापने आणि ग्रामीण भागातील नागरिकांची मोठ्या प्रमाणावर ये-जा यामुळे घोटचे महत्त्व दिवसेंदिवस वाढत आहे.
या सर्व बाबींचा विचार करून घोट ग्रामपंचायतीला नगरपंचायतीचा दर्जा देण्यात यावा, अशी मागणी सामाजिक कार्यकर्ते संजय वडेट्टीवार यांनी शासनाकडे केली आहे.