समृद्धी महामार्गावर पुन्हा एकदा भीषण अपघाताची घटना घडली असून भरधाव फॉर्च्यूनर कारने समोर धावणाऱ्या ट्रेलरला पाठीमागून जोरदार धडक दिल्याने पती-पत्नीचा जागीच मृत्यू झाला.
बुलढाणा जिल्ह्यातील दुसरबीडजवळ दुर्घटना; दोन लहान मुले आणि चालक गंभीर जखमी, जालन्यात उपचार सुरू
बुलढाणा (Buldhana Accident) : समृद्धी महामार्गावर पुन्हा एकदा भीषण अपघाताची घटना घडली असून भरधाव फॉर्च्यूनर कारने समोर धावणाऱ्या ट्रेलरला पाठीमागून जोरदार धडक दिल्याने पती-पत्नीचा जागीच मृत्यू झाला. या अपघातात कारमधील दोन लहान मुले आणि चालक गंभीर जखमी झाले असून त्यांच्यावर जालना येथील रुग्णालयात उपचार सुरू आहेत.
ही दुर्घटना बुलढाणा जिल्ह्यातील दुसरबीड परिसरात समृद्धी महामार्गावर घडली. प्राथमिक माहितीनुसार, डॉ. सय्यद आसिफ सय्यद उमर हे पत्नी गुलसीतान बी आणि कुटुंबीयांसह नागपूरहून छत्रपती संभाजीनगरकडे फॉर्च्यूनर कारने प्रवास करत होते.
प्रवासादरम्यान समोर धावणाऱ्या ट्रेलरला फॉर्च्यूनर कारची पाठीमागून जोरदार धडक बसली. या भीषण धडकेत डॉ. सय्यद आसिफ आणि त्यांच्या पत्नी गुलसीतान बी यांचा घटनास्थळीच मृत्यू झाला.
अपघातात कारचा चालक तसेच कारमधील दोन लहान मुले गंभीर जखमी झाली आहेत. जखमींना तातडीने जालना येथील रुग्णालयात दाखल करण्यात आले असून त्यांच्यावर उपचार सुरू आहेत.
राज्यातील महामार्गांवरील वाढत्या अपघातांच्या पार्श्वभूमीवर समृद्धी महामार्गावरील ही आणखी एक गंभीर दुर्घटना ठरली आहे. या अपघातामुळे काही काळ परिसरात वाहतुकीवर परिणाम झाला होता.