घटनेचे वृत्त देशोन्नती डिजिटलमध्ये प्रसिद्ध होताच सामाजिक संस्था आणि प्रशासनाने तात्काळ दखल घेत मदतीचा हात पुढे केला आहे.
महसूल विभागाकडूनही ३२ हजारांचे आर्थिक सहाय्य
देवणी (Akka Foundation) : देवणी तालुक्यातील बोंबळी येथील वृद्ध शेतकरी काशिनाथ गायकवाड यांचा एक बैल वीज कोसळल्याने मृत्युमुखी पडल्यामुळे शेती मशागतीसाठी त्यांनी आपल्या पत्नीच्या खांद्यावर जू देत औत चालविल्याची हृदयद्रावक घटना समोर आली होती. या घटनेचे वृत्त देशोन्नती डिजिटलमध्ये प्रसिद्ध होताच सामाजिक संस्था आणि प्रशासनाने तात्काळ दखल घेत मदतीचा हात पुढे केला आहे.
गेल्या आठवड्यात काशिनाथ गायकवाड यांच्या बैलजोडीवर वीज कोसळून एका बैलाचा मृत्यू झाला. आधीच भूमिहीन असलेल्या या शेतकऱ्याचा उदरनिर्वाह गावातील शेतकऱ्यांची शेती कसण्यावर अवलंबून आहे. मात्र बैल गमावल्यामुळे त्यांच्या समोर शेती मशागतीचे मोठे संकट उभे राहिले होते.
एका बैलावर औत चालविणे शक्य नसल्याने काशिनाथ गायकवाड यांनी आपल्या वृद्ध पत्नीला औताला जुंपून शेतीची मशागत सुरू ठेवण्याचा निर्णय घेतला होता. या घटनेचे वृत्त प्रसिद्ध झाल्यानंतर अक्का फाऊंडेशन, निलंगा शेतकरी कुटुंबाच्या मदतीसाठी पुढे आले.
विशेष म्हणजे जवळगा मंडळाचे जिल्हा परिषद सदस्य रामलिंग शेरे यांनी आमदार संभाजी पाटील निलंगेकर आणि युवा नेते अरविंद पाटील निलंगेकर यांच्या माध्यमातून प्रशासनाशी पाठपुरावा केला. त्यानंतर तहसील प्रशासनामार्फत ३२ हजार रुपयांची आर्थिक मदत काशिनाथ गायकवाड यांना उपलब्ध करून देण्यात आली.
तसेच सामाजिक बांधिलकी जपत अक्का फाऊंडेशनच्या वतीने शेतकऱ्याच्या शेतावर जाऊन २० हजार रुपयांची रोख मदत करण्यात आली. या मदतीमुळे संकटात सापडलेल्या शेतकरी कुटुंबाला मोठा दिलासा मिळाला आहे.
यावेळी तहसीलदार सोमनाथ वाडकर, जिल्हा परिषद सदस्य रामलिंग शेरे, तलाठी तसेच सुधीर भोसले, माऊली शिंदे, तानाजी कारभारी, व्यंकट कारभारी, विठ्ठल बोयाने, अभंग सूर्यवंशी, राम गायकवाड, उत्तम गायकवाड, बजरंग पाटील, प्रकाश शिंदे, संतोष पाटील, धनाजी येचे यांच्यासह ग्रामस्थ मोठ्या संख्येने उपस्थित होते.
संकटाच्या काळात प्रशासन, लोकप्रतिनिधी आणि सामाजिक संस्थांनी दिलेला मदतीचा हात हा काशिनाथ गायकवाड यांच्यासाठी नव्या आशेचा किरण ठरला आहे.