ब्राझीलच्या रिओ डी जनेरियो शहरात दोन हेलिकॉप्टर हवेतच धडकल्याने भीषण अपघात झाला असून या दुर्घटनेत हेलिकॉप्टरमधील सर्व ६ जणांचा मृत्यू झाल्याची माहिती स्थानिक अधिकाऱ्यांनी दिली आहे.
(Mid-Air Collision) ब्राझीलच्या रिओ डी जनेरियो शहरात दोन हेलिकॉप्टर हवेतच धडकल्याने भीषण अपघात झाला असून या दुर्घटनेत हेलिकॉप्टरमधील सर्व ६ जणांचा मृत्यू झाल्याची माहिती स्थानिक अधिकाऱ्यांनी दिली आहे. रविवारी सकाळी ही दुर्घटना शहराच्या पश्चिम उपनगर रिक्रेयो दोस बँदीरांतेस (Recreio dos Bandeirantes) परिसरात घडली. या घटनेच्या कारणांचा शोध घेण्यासाठी अधिकृत तपास सुरू करण्यात आला आहे.
अग्निशमन दलाच्या माहितीनुसार, दोन्ही हेलिकॉप्टर हवेत धडकून थेट खाली कोसळले आणि इलेक्ट्रिक कार विक्री केंद्राच्या पार्किंगमध्ये पडले. या अपघातामुळे सुमारे २० वाहनांना आग लागली. अग्निशमन विभागाचे प्रवक्ते फाबिओ कॉन्ट्रेरास यांनी सांगितले की, लिथियम-आयन बॅटरीमुळे निर्माण होणाऱ्या विषारी वायूंमुळे आग विझवणे अत्यंत कठीण झाले. त्यांनी सांगितले की, “या प्रकारच्या बॅटरीला आग लागल्यास अत्यंत विषारी वायू बाहेर पडतात आणि आगीची तीव्रता व तापमान मोठ्या प्रमाणात वाढते.”
ते पुढे म्हणाले की, “या प्रकारची आग विझवण्यासाठी सामान्य वाहनाच्या आगीपेक्षा तीन ते चार पट अधिक पाण्याची आवश्यकता असते.” त्यांनी हेही नमूद केले की, परिसर अत्यंत दाट लोकवस्तीचा होता आणि जर ही हेलिकॉप्टर पार्किंगमध्ये न कोसळली असती, तर मृतांचा आकडा आणखी मोठा असण्याची शक्यता होती. कॉन्ट्रेरास यांच्या माहितीनुसार, घटनास्थळी एका हेलिकॉप्टरचे जळालेले अवशेष २० वाहनांच्या मध्ये आढळले आणि त्यात पाच मृतदेह सापडले. दुसरे हेलिकॉप्टर सुमारे १०० मीटर अंतरावर आढळले, ज्यात फक्त पायलट होता आणि त्याचाही मृत्यू झाला.
अपघातानंतर हेलिकॉप्टरचे अवशेष घटनास्थळापासून अनेकशे मीटर अंतरावर विखुरलेले आढळले. सोशल मीडियावर समोर आलेल्या व्हिडिओंमध्ये कार पार्किंगमधून आकाशात दाट धुराचा मोठा लोट उठताना दिसत होता. अधिकाऱ्यांनी सांगितले की, अपघाताचे नेमके कारण निश्चित करण्यासाठी घटनेचे रेकॉर्डिंग आणि पुरावे तपासणे आवश्यक आहे.
ब्राझीलमध्ये हेलिकॉप्टर अपघात तुलनेने सामान्य मानले जातात. सेंटर फॉर इन्व्हेस्टिगेशन अँड प्रिव्हेन्शन ऑफ एरोनॉटिकल अॅक्सिडेंट्स (CENIPA) च्या आकडेवारीनुसार, २०२६ मध्ये या अपघातापूर्वीच ८४ विमान अपघातांची नोंद झाली होती.
पोलीस सूत्रांच्या माहितीनुसार, अमेरिकन गायक आणि विनोदी कलाकार ऑलिव्हर ट्री यांचे नाव विमानवाहतूक प्राधिकरणाला दिलेल्या प्रवासी यादीत होते. मात्र, मृतांपैकी कोणत्याही व्यक्तीची ओळख अद्याप अधिकृतपणे पटलेली नाही. ऑलिव्हर ट्री यांनी ४ जून रोजी अर्जेंटिनातील ब्यूनस आयर्स येथे परफॉर्मन्स दिला होता. तसेच त्यांनी शनिवारी ब्राझीलमधील एका परिसरात फुटबॉल खेळतानाचा व्हिडिओ इन्स्टाग्रामवर शेअर केला होता.
अर्जेंटिनाच्या ‘ब्लेंडर’ या स्ट्रीमिंग चॅनेलने सांगितले की, कंटेंट क्रिएटर गास्पर प्रिम दियाझ (Gaspi) हा देखील एका हेलिकॉप्टरमध्ये होता. गास्पीचे यूट्यूबवर २.८ दशलक्षांहून अधिक फॉलोअर्स होते आणि तो अवघ्या २३ वर्षांचा होता. ब्लेंडरने X (ट्विटर) वर पोस्ट करत लिहिले की, “तुझ्या कला, जादू आणि संवेदनशीलतेसाठी धन्यवाद. आम्ही तुला नेहमी मिस करू.”
अपघातादरम्यान तिथे उपस्थित असलेले टायर दुरुस्ती कामगार फर्नांडेस दे फ्रेटास यांनी सांगितले की, त्यांनी हवेत दोन हेलिकॉप्टरची टक्कर होताना पाहिली. त्यापैकी एकातून प्रवासी खाली उडी मारताना दिसल्याचेही त्यांनी सांगितले.
“तो प्रसंग अत्यंत भयानक आणि हादरवून टाकणारा होता,” असे त्यांनी सांगितले. या घटनेमुळे रिओ डी जनेरियोमध्ये शोककळा पसरली असून प्रशासनाने सखोल तपास सुरू केला आहे.