नाव नरेंद्र मोदी, पण पंतप्रधान नाही!

पंतप्रधानांचे नाव, पण सामान्य नागरिक

भोपाळ (Narendra Modi) : पंतप्रधान नरेंद्र मोदी यांच्या वाढदिवसानिमित्त देशभरातून शुभेच्छांचा वर्षाव होत असतानाच मध्य प्रदेशातील बुरहानपूर येथील निवृत्त मुख्याध्यापक नरेंद्र मोदी हेही चर्चेत आले आहेत. पंतप्रधानांशी तंतोतंत जुळणारे नाव असल्याने त्यांना आयुष्यभर अनेकदा गमतीदार आणि संभ्रमाचे प्रसंग अनुभवावे लागले आहेत.

67 वर्षीय नरेंद्र मोदी (Narendra Modi) नुकतेच दिल्ली येथे एका प्रशिक्षणासाठी गेले होते. तेथे त्यांनी आपली ओळख सांगितल्यानंतर संबंधित लिपिकाने त्यांच्याकडे आश्चर्याने पाहिले. ‘काय चेष्टा करताय?’ असा प्रतिप्रश्नही त्यांना करण्यात आला. त्यानंतर नरेंद्र मोदी यांनी आपले ओळखपत्र दाखवले. मात्र, ते पाहिल्यानंतरही लिपिकाचा लगेच विश्वास बसला नाही. अखेर सुरक्षा रक्षक आणि लिपिकाला समजावून सांगितल्यानंतर ते खरोखरच नरेंद्र मोदी असल्याची खात्री पटली.

नावामुळे निर्माण होणारे असे प्रसंग नरेंद्र मोदी (Narendra Modi) यांच्यासाठी नवीन नाहीत. त्यामुळे प्रवास करताना किंवा अधिकृत कामानिमित्त बाहेर पडताना त्यांना नेहमीच ओळखपत्र जवळ बाळगावे लागते.

‘मी पंतप्रधान नाही’ असे सांगावे लागले

2015 मध्येही नरेंद्र मोदी (Narendra Modi) यांना अशाच एका मजेशीर प्रसंगाला सामोरे जावे लागले होते. त्यावेळी ते एका शाळेचे मुख्याध्यापक होते. विद्यार्थ्यांच्या शिष्यवृत्तीच्या कामासाठी त्यांनी बँकेत दूरध्वनी केला. समोरच्या व्यवस्थापकाने ‘नरेंद्र मोदी बोलतोय’ असे ऐकताच काही क्षण गोंधळ निर्माण झाला.

परिस्थिती स्पष्ट करण्यासाठी त्यांना त्यावेळी ‘मी पंतप्रधान नरेंद्र मोदी नाही’ असे सांगावे लागले. त्यानंतरच समोरच्या व्यक्तीचा संभ्रम दूर झाला.

पंतप्रधान नरेंद्र मोदी (Narendra Modi) आणि बुरहानपूरचे निवृत्त मुख्याध्यापक नरेंद्र मोदी यांचे नाव एकच असले, तरी दोघांची ओळख आणि कार्यक्षेत्र पूर्णपणे वेगळी आहेत. मात्र, नावातील या अनोख्या साम्यामुळे बुरहानपूरचे नरेंद्र मोदी अनेकदा चर्चेचा विषय ठरतात.