500 कोटींच्या सायबर रॅकेटचा पर्दाफाश; गोव्यातून 12 आरोपींना केली अटक

वर्धा (Cyber ​​Racket Busted) : दुबईतून चालणार्‍या सायबर रॅकेटचा मुंबईच्या गुन्हे अन्वेषण शाखेच्या कक्ष-२च्या पोलिसांनी अखेर पर्दाफाश करीत गोव्यातून 12 आरोपींना अटक केली आहे. गुन्हे अन्वेषण शाखेच्या पोलिसांनी गोव्यातील कळंगुट पोलिस ठाण्याच्या हद्दीतील कासा डी निकोल व्हिला येथे छापा टाकून ही कारवाई केली. आता यातील मुख्य आरोपींच्या मुस्क्या आवळण्याकरीता पोलिस नियोजन करीत आहे.

यातील काही आरोपींना 35 हजार रुपये दरमहा वेतनावर ठेवले होते. पोलिस उपायुक्त राजतिलक रोशन यांनी या कारवाईची माहिती दिली. पोलिसांनी या कारवाईत 15 लॅपटॉप, 85 मोबाईल, 125 एटीएम कार्ड, 76 सिमकार्ड, 22 चेकबूक तसेच 77 पासबूक जप्त केले आहेत. या (Cyber ​​Racket Busted) रॅकेटचा सूत्रधार दुबईत बसून सूत्रे हलवायचा, त्याचा शोध घेतला जात आहे. 150 बँक खाती तपासाच्या कक्षेत आहेत.राष्ट्रीय हेल्पलाईन 1930 वर आलेल्या 83 तक्रारींच्या अनुषंगाने ही कारवाई करण्यात आली आहे.

या कारवाईत पोलिसांनी अटक केलेले आरोपी मुंबई तसेच गुजरात राज्यातील रहिवासी आहेत.पायधुणी पोलिस ठाण्यात दाखल असलेल्या सायबर फसवणूक गुन्ह्याच्या तपासातून या रॅकेटचा उलगडा झाला. यापूर्वी (Cyber ​​Racket Busted) अटक केलेल्या आरोपींची चौकशी तसेच डिजिटल पुराव्याच्या विश्लेषणातून गोव्यातून आर्थिक फसवणुकीचा व्यवहार सुरु असल्याचे समोर आले, पण पुढे याचा मुख्य सूत्रधार दुबईत असल्याचेही स्पष्ट झाले. मागील 6 महिन्यात या टोळीने 500 कोटींपेक्षा जास्त रकमेची उलाढाल केल्याचा पोलिसांचा संशय आहे.