बारामतीत नेमकं काय घडतंय?
बारामती (Baramati By Election) : बारामती विधानसभा पोटनिवडणुकीच्या पार्श्वभूमीवर राजकीय हालचालींना वेग आला असून उपमुख्यमंत्री सुनेत्रा पवार आज आपला उमेदवारी अर्ज दाखल करणार आहेत. अर्ज दाखल करण्यापूर्वी राष्ट्रवादी काँग्रेसच्या अजित पवार गटाचा बारामतीत मोठा मेळावा पार पडला. या मेळाव्यात पक्षातील अनेक दिग्गज नेत्यांची उपस्थिती दिसून आली, ज्यातून या निवडणुकीचे महत्त्व अधोरेखित झाले.
या मेळाव्याला सुनेत्रा पवार यांच्यासह जय पवार, पार्थ पवार, सुनील तटकरे, अदिती तटकरे, दिलीप वळसे पाटील, नरहरी झिरवळ, दत्तात्रय भरणे, धनंजय मुंडे, माणिकराव कोकाटे, संजय बनसोडे, चेतन तुपे, सना मलिक, सरोज अहिरे यांसारखे अनेक नेते उपस्थित होते. पक्षाच्या एकजुटीचे प्रदर्शन या निमित्ताने करण्यात आले.
मेळाव्यात बोलताना सुनील तटकरे यांनी बारामती पोटनिवडणूक बिनविरोध व्हावी, अशी भूमिका मांडली. सर्व राजकीय पक्षांनी या निवडणुकीकडे सहमतीने पाहावे, अशी विनंती त्यांनी केली. मात्र, जर निवडणूक झालीच तर सुनेत्रा पवार यांना विक्रमी मताधिक्याने विजयी करण्याचा संकल्प कार्यकर्त्यांनी करावा, असे आवाहन त्यांनी केले. 1952 पासूनच्या निवडणूक इतिहासातील सर्वाधिक मताधिक्याचा विक्रम मोडण्याचे उद्दिष्ट ठेवावे, असेही ते म्हणाले. त्यांनी हे यश अजित पवार यांना खरी श्रद्धांजली ठरेल, असे नमूद केले.
याचवेळी सुनील तटकरेंनी सुनेत्रा पवार यांना उद्देशून विशेष विनंती केली. अजित पवार जसे निवडणुकीच्या शेवटच्या टप्प्यात सभा घेत असत, त्याच पद्धतीने आपणही शेवटच्या सभेलाच उपस्थित राहावे, अशी अपेक्षा त्यांनी व्यक्त केली.
दरम्यान, महायुतीकडून ही निवडणूक बिनविरोध व्हावी यासाठी काही प्रयत्न झाले होते. त्यासाठी शिवसेना (ठाकरे गट) प्रमुख उद्धव ठाकरे आणि इतर नेत्यांशी संपर्क साधल्याची चर्चा आहे. मात्र, काँग्रेसने आकाश मोरे यांना उमेदवारी देत ही निवडणूक लढवण्याचा निर्णय घेतला आहे. त्यामुळे बारामतीत थेट लढत होण्याची चिन्हे स्पष्ट झाली आहेत. आकाश मोरे हे देखील आज आपला अर्ज दाखल करणार आहेत.
दुसरीकडे, आमदार रोहित पवार यांनी या निवडणुकीला भावनिक रंग देत कार्यकर्ते आणि मतदारांना आवाहन केले आहे. ही निवडणूक प्रत्यक्षात अजित पवारच लढवत आहेत, असे मानून सुनेत्रा पवार यांना पाठिंबा द्यावा, असे त्यांनी म्हटले आहे.
उल्लेखनीय म्हणजे, उपमुख्यमंत्री अजित पवार यांच्या 28 जानेवारी 2026 रोजी झालेल्या निधनामुळे बारामती विधानसभा मतदारसंघ रिक्त झाला आहे. या जागेसाठी आता पोटनिवडणूक जाहीर करण्यात आली असून 23 एप्रिल रोजी मतदान होणार आहे. त्यानंतर 4 मे रोजी निकाल जाहीर होईल. त्यामुळे येत्या काही दिवसांत बारामतीत राजकीय वातावरण अधिकच तापण्याची शक्यता आहे.
