धानाचे चुकारे व बोनससाठी काँग्रेसचे तहसीलदारांमार्फत मुख्यमंत्र्यांना निवेदन

कोरची (Paddy Payments-Bonus) : कोरची तालुका हा अतिसंवेदनशील आदिवासीबहुल क्षेत्र असून येथील नागरिकांचे मुख्य उपजीविकेचे साधन भातशेती आहे. मात्र खरीप हंगाम 2025-26 मधील धान विक्रीचे चुकारे अद्यापही अनेक शेतकऱ्यांना मिळाले नसल्याने शेतकरी आर्थिक संकटात सापडले आहेत. याबाबत तात्काळ उपाययोजना करावी, धानाला हेक्टरी २५ हजार रुपये बोनस जाहीर करावा तसेच रब्बी हंगाम 2026 च्या ऑनलाईन प्रक्रियेला मुदतवाढ द्यावी, या मागण्यांसाठी कोरची तालुका काँग्रेस कमिटीच्या वतीने मुख्यमंत्री यांना तहसीलदार कोरची यांच्या मार्फत निवेदन देण्यात आले.

निवेदनात म्हटले आहे की, धानाचे चुकारे (Paddy Payments-Bonus) प्रलंबित असल्यामुळे अनेक शेतकऱ्यांवर उपासमारीची वेळ आली आहे. बँकांकडून घेतलेल्या कर्जाचे व्याज भरणेही शेतकऱ्यांना कठीण झाले असून आगामी हंगामासाठी शेतीचे नियोजन कसे करावे, असा प्रश्न शेतकऱ्यांसमोर निर्माण झाला आहे. त्यामुळे शासनाने या गंभीर प्रश्नाकडे तातडीने लक्ष देऊन शेतकऱ्यांचे धानाचे चुकारे अदा करावेत, अशी मागणी करण्यात आली आहे.

तसेच धान उत्पादक शेतकऱ्यांना दिलासा देण्यासाठी हेक्टरी २५ हजार रुपये बोनस जाहीर करावा व रब्बी हंगाम 2026 साठी सुरू असलेल्या ऑनलाईन प्रक्रियेला मुदतवाढ द्यावी, अशी मागणीही निवेदनातून करण्यात आली. अन्यथा कोरची काँग्रेस कमिटीच्या वतीने तीव्र आंदोलन छेडण्यात येईल, असा इशाराही देण्यात आला आहे.

यावेळी कोरची तालुका काँग्रेस कमिटीचे तालुका अध्यक्ष मनोज अग्रवाल, जिल्हा उपाध्यक्ष रामसुराम काटेंगे, अनुसूचित जाती तालुका अध्यक्ष रविकुमार नंदेश्वर, मदन हिडामी, संपत धूर्वे, मेहतरू घाटघूमर, बस्तर होळी, राधेश्याम दरवडे, चमरू कल्लो, राजाराम नैताम, पुनाराम सोनवाणी, भिकम फुलकुवर, हेमकृष्ण सुवा, रमेश होळी, बाबूलाल शेंडे यांच्यासह अनेक शेतकरी व काँग्रेस कार्यकर्ते उपस्थित होते.