आगामी विधानसभा निवडणुका आणि पक्षातील संघटनात्मक फेरबदलांच्या पार्श्वभूमीवर भाजपच्या केंद्रीय नेतृत्वाने महत्त्वाच्या राज्यांसाठी नव्या प्रभारींची नियुक्ती केली आहे.
आगामी विधानसभा निवडणुकीच्या पार्श्वभूमीवर तावडेंकडे उत्तर प्रदेशची धुरा; जगदीश पटेल सह-प्रभारी
आगामी विधानसभा निवडणुका आणि पक्षातील संघटनात्मक फेरबदलांच्या पार्श्वभूमीवर भाजपच्या केंद्रीय नेतृत्वाने महत्त्वाच्या राज्यांसाठी नव्या प्रभारींची नियुक्ती केली आहे. महाराष्ट्रातील भाजपचे राष्ट्रीय सरचिटणीस आणि राज्यसभा खासदार विनोद तावडे यांच्यावर पक्षाने मोठी जबाबदारी सोपवली असून, त्यांची उत्तर प्रदेशच्या राज्य प्रभारीपदी नियुक्ती करण्यात आली आहे. देशाच्या राजकारणात अत्यंत महत्त्वाचे स्थान असलेल्या उत्तर प्रदेशात पुढील वर्षी विधानसभा निवडणुका होणार असल्याने तावडेंची ही नियुक्ती विशेष महत्त्वाची मानली जात आहे.
बिहारचे प्रभारी म्हणून यापूर्वी जबाबदारी सांभाळलेल्या तावडेंना आता देशातील सर्वाधिक राजकीय वजन असलेल्या उत्तर प्रदेशाची संघटनात्मक जबाबदारी देण्यात आली आहे. बिहारमधील त्यांच्या कामाचा अनुभव आणि संघटनात्मक कौशल्य लक्षात घेऊन पक्षाच्या केंद्रीय नेतृत्वाने त्यांच्यावर पुन्हा विश्वास व्यक्त केल्याचे या नियुक्तीतून स्पष्ट झाले आहे.
भाजपचे राष्ट्रीय अध्यक्ष नितीन नवीन यांनी उत्तर प्रदेश, पंजाब आणि गुजरात या तीन महत्त्वाच्या राज्यांसाठी प्रभारी आणि सह-प्रभारी नियुक्त करण्याची घोषणा केली. या नियुक्त्या तात्काळ प्रभावाने लागू करण्यात आल्या आहेत. भाजपने यासंदर्भात अधिकृत प्रसिद्धीपत्रकही जारी केले आहे.
उत्तर प्रदेशसाठी विनोद तावडे यांची प्रभारी म्हणून निवड करण्यात आली असून, राष्ट्रीय मंत्री जगदीश ईश्वरभाई पटेल यांच्याकडे सह-प्रभारीपद देण्यात आले आहे. आगामी उत्तर प्रदेश विधानसभा निवडणुकीपूर्वी पक्षाची संघटनात्मक तयारी अधिक मजबूत करण्याची जबाबदारी या नव्या टीमवर असेल.
पंजाबमध्ये भाजपचे राष्ट्रीय सरचिटणीस आणि राज्यसभा खासदार डॉ. सतीश पुनिया यांची प्रभारी म्हणून नियुक्ती करण्यात आली आहे. तर गुजरातची जबाबदारी राष्ट्रीय कार्यालय प्रभारी आणि राज्यसभा खासदार तरुण चुघ यांच्याकडे सोपवण्यात आली आहे.
दरम्यान, भाजप अध्यक्ष नितीन नवीन यांनी सोमवारी पक्षाच्या नव्या राष्ट्रीय कार्यकारिणीची घोषणा केली. या नव्या कार्यकारिणीत अनुभवी नेत्यांसह काही नव्या चेहऱ्यांनाही संघटनात्मक जबाबदाऱ्या देण्यात आल्या आहेत. वसुंधरा राजे, राम माधव आणि स्मृती इराणी यांना महत्त्वाच्या भूमिका देण्यात आल्या आहेत.
पियुष गोयल यांची राष्ट्रीय खजिनदारपदी नियुक्ती करण्यात आली असून, बी. एल. संतोष यांच्याकडे राष्ट्रीय संघटन महासचिवपद कायम ठेवण्यात आले आहे. संघटनात्मक अनुभव, तरुण नेतृत्व आणि तळागाळातील पक्षाशी असलेला संपर्क यांचा समन्वय साधण्याचा प्रयत्न या नव्या रचनेतून करण्यात आल्याचे पक्षाकडून मांडण्यात आले आहे.
नव्या राष्ट्रीय कार्यकारिणीत स्थान मिळाल्यानंतर लगेचच विनोद तावडे यांच्यावर उत्तर प्रदेशसारख्या महत्त्वाच्या राज्याची जबाबदारी सोपवण्यात आल्याने पक्षातील त्यांच्या वाढत्या संघटनात्मक भूमिकेकडेही लक्ष वेधले गेले आहे.