शिवसेना पक्ष-चिन्हावरील सुनावणीत संजय राऊतांचा शिंदे गटावर हल्लाबोल; म्हणाले, ‘तो फुटीर गट’

ठाकरे गटाचा सर्वोच्च न्यायालयातील युक्तिवाद संपला; आता शिंदे गटाची बाजू मांडली जाणार, विशाखा राऊत यांच्या प्रकरणावरही राऊतांची प्रतिक्रिया

मुंबई : शिवसेना पक्ष आणि चिन्हाच्या वादावर सर्वोच्च न्यायालयात सुनावणी सुरू असताना ठाकरे गटाचे खासदार संजय राऊत यांनी शिंदे गटावर जोरदार टीका केली आहे. ठाकरे गटाच्या वतीने युक्तिवाद पूर्ण झाल्यानंतर आता शिंदे गटाची बाजू सर्वोच्च न्यायालयात मांडली जाणार आहे. याच पार्श्वभूमीवर राऊत यांनी शिंदे गटाला फुटीर गट संबोधत त्यांच्यावर निशाणा साधला.

सर्वोच्च न्यायालयातील सुनावणीबाबत बोलताना संजय राऊत म्हणाले की, शिवसेनेच्या बाजूचा युक्तिवाद संपला आहे. शिंदे गट आता त्यांचे म्हणणे मांडेल. मात्र, “गद्दारांना युक्तिवाद नसतो, तो फुटीर गट आहे,” अशा शब्दांत त्यांनी शिंदे गटावर टीका केली.

राऊत यांनी पुढे टोला लगावत शिंदे गटाची भूमिका स्पष्ट होऊ द्यावी, असे म्हटले. ते सर्वोच्च न्यायालयात नेमके काय सांगतात आणि त्यांची बाजू काय आहे, हे समोर येऊ द्यावे, अशी भूमिका त्यांनी मांडली. सुरत आणि गुवाहाटीच्या संदर्भानेही त्यांनी शिंदे गटावर टीकास्त्र सोडले.

सर्वोच्च न्यायालयात पक्ष आणि चिन्हाच्या वादावर सुनावणी

दरम्यान, शिवसेना पक्ष आणि निवडणूक चिन्हासंदर्भातील प्रकरणाची सर्वोच्च न्यायालयात सुनावणी सुरू आहे. ठाकरे गटाच्या बाजूने वकील कपिल सिब्बल यांनी युक्तिवाद केला असून त्यांची बाजू पूर्ण झाली आहे. त्यानंतर आता शिंदे यांच्या शिवसेनेचा युक्तिवाद सुरू होणार आहे.

विशाखा राऊत यांच्या नगरसेवकपदावर प्रश्नचिन्ह

दरम्यान, शिवसेना उद्धव ठाकरे गटाच्या नगरसेविका विशाखा राऊत यांचे कुणबी प्रमाणपत्र पालघर जिल्हाधिकाऱ्यांनी रद्द केले आहे. त्यामुळे त्यांचे नगरसेवकपद धोक्यात येण्याची शक्यता निर्माण झाली आहे. या निर्णयाविरोधात अपील करण्यासाठी त्यांच्याकडे तीन महिन्यांचा कालावधी उपलब्ध आहे.

विशाखा राऊत या माजी महापौर असून त्या वॉर्ड क्रमांक 191 मधून निवडून आल्या आहेत. या निवडणुकीत त्यांनी शिंदे गटाच्या शिवसेनेचे नेते सदा सरवणकर यांच्या कन्या प्रिया सरवणकर यांचा पराभव केला होता.

या प्रकरणावर प्रतिक्रिया देताना संजय राऊत यांनी ठाकरे गटाची संख्या कमी करण्यासाठी जाणीवपूर्वक प्रयत्न केले जात असल्याचा आरोप केला. भाजपच्या 25 नगरसेवकांच्या जात प्रमाणपत्रांबाबत आक्षेप असतानाही त्यावर कोणताही निर्णय होताना दिसत नसल्याचे त्यांनी म्हटले. मात्र, ठाकरे गटाची संख्या कमी करण्यासाठी षडयंत्र रचले जात असल्याचा आरोप राऊत यांनी केला.