६ ते ११ जुलैदरम्यान तीन देशांना भेट; संरक्षण, व्यापार, गुंतवणूक, सागरी सुरक्षा, तंत्रज्ञान आणि शिक्षण क्षेत्रातील सहकार्य वाढवण्यावर विशेष लक्ष
पंतप्रधान नरेंद्र मोदी यांच्या सहा दिवसांच्या परदेश दौऱ्याची आज (६ जुलै) सुरुवात झाली. ६ ते ११ जुलैदरम्यान होणाऱ्या या दौऱ्यात ते इंडोनेशिया, ऑस्ट्रेलिया आणि न्यूझीलंड या तीन महत्त्वाच्या देशांना भेट देणार आहेत. द्विपक्षीय संबंध अधिक दृढ करणे, विविध क्षेत्रांतील सहकार्याचा विस्तार करणे आणि इंडो-पॅसिफिक प्रदेशात भारताची धोरणात्मक भूमिका अधिक मजबूत करणे, हा या दौऱ्याचा प्रमुख उद्देश आहे.
या दौऱ्यात संरक्षण, व्यापार, गुंतवणूक, सागरी सुरक्षा, आधुनिक तंत्रज्ञान, शिक्षण तसेच इतर महत्त्वाच्या क्षेत्रांमध्ये परस्पर सहकार्य वाढवण्यासाठी विविध स्तरांवर चर्चा होणार आहे.
Over the next few days, I will be attending various programmes in Indonesia, Australia and New Zealand. The aim of these meetings would be to boost economic and strategic cooperation with these valued developmental partners and ensure the youth of our nation get more…
— Narendra Modi (@narendramodi) July 6, 2026
पहिला टप्पा : इंडोनेशिया दौरा
दौऱ्याच्या प्रारंभी पंतप्रधान मोदी इंडोनेशियाला भेट देणार असून, ही भेट इंडोनेशियाचे राष्ट्राध्यक्ष प्रबोवो सुबियांतो यांच्या निमंत्रणावर आयोजित करण्यात आली आहे. या भेटीदरम्यान ते जकार्ता आणि योग्यकार्ता येथे विविध अधिकृत कार्यक्रमांना उपस्थित राहतील. संरक्षण, व्यापार, गुंतवणूक आणि सागरी सुरक्षेसंदर्भातील सहकार्य अधिक बळकट करण्यासाठी दोन्ही देशांमध्ये सविस्तर चर्चा होणार आहे.
भारत आणि इंडोनेशियामधील ऐतिहासिक व सांस्कृतिक नात्याचे प्रतीक मानल्या जाणाऱ्या प्रसिद्ध प्रम्बानन मंदिरालाही पंतप्रधान मोदी भेट देणार आहेत. तसेच या दौऱ्यादरम्यान इंडोनेशियाकडून ब्रह्मोस क्षेपणास्त्र खरेदीबाबत महत्त्वपूर्ण घोषणा होण्याची शक्यता व्यक्त केली जात आहे.
दुसरा टप्पा : ऑस्ट्रेलिया भेट
इंडोनेशियानंतर पंतप्रधान मोदी ऑस्ट्रेलियाचा दौरा करणार आहेत. तेथे ऑस्ट्रेलियाचे पंतप्रधान अँथनी अल्बानीज यांच्यासोबत द्विपक्षीय बैठक होणार आहे. या चर्चेत संरक्षण, सुरक्षा, व्यापार, शिक्षण, कौशल्य विकास, अत्याधुनिक तंत्रज्ञानातील सहकार्य तसेच क्रीडा क्षेत्रातील भागीदारी वाढवण्यावर भर दिला जाणार आहे.
याशिवाय, मेलबर्न येथे आयोजित भारतीय समुदायाच्या विशेष कार्यक्रमालाही पंतप्रधान मोदी संबोधित करणार आहेत.
शेवटचा टप्पा : न्यूझीलंड दौरा
दौऱ्याच्या अंतिम टप्प्यात पंतप्रधान मोदी न्यूझीलंडमधील ऑकलंड येथे पोहोचतील. येथे ते न्यूझीलंडचे पंतप्रधान क्रिस्टोफर लक्सन यांची भेट घेऊन द्विपक्षीय संबंधांवर चर्चा करणार आहेत. व्यापार, गुंतवणूक, आर्थिक सहकार्य तसेच भारत-न्यूझीलंड मुक्त व्यापार कराराच्या अंमलबजावणीसंदर्भात दोन्ही नेत्यांमध्ये विचारविनिमय होणार आहे. या दौऱ्यात पंतप्रधान मोदी भारतीय समुदायाच्या कार्यक्रमातही सहभागी होणार आहेत.
दौऱ्यापूर्वी पंतप्रधान मोदींची भूमिका
परदेश दौऱ्यापूर्वी पंतप्रधान नरेंद्र मोदी यांनी इंडोनेशियासोबत भारताचे ऐतिहासिक आणि सांस्कृतिक संबंध अधोरेखित केले. तसेच ऑस्ट्रेलिया आणि न्यूझीलंडसोबतची भारताची भागीदारी सातत्याने अधिक मजबूत होत असल्याचे त्यांनी नमूद केले. या भेटींमुळे परस्पर सहकार्याला नवी गती मिळेल, असा विश्वास व्यक्त करत त्यांनी इंडो-पॅसिफिक प्रदेशातील भारताच्या वाढत्या भूमिकेसाठी हा दौरा महत्त्वपूर्ण ठरणार असल्याचे सांगितले.
