ब्लॅक अँड व्हाईटमध्ये साकारलेला सायकोलॉजिकल हॉरर चित्रपट; तीन पात्रांवर आधारित कथेनं जिंकली प्रेक्षक आणि समीक्षकांची मनं
मल्याळम चित्रपटसृष्टीने पुन्हा एकदा आशयप्रधान सिनेमांची ताकद सिद्ध केली आहे. कमी बजेट, मर्यादित कलाकार आणि वेगळ्या सादरीकरणाच्या जोरावरही चित्रपट जागतिक स्तरावर यशस्वी ठरू शकतो, याचं उदाहरण म्हणजे दिग्दर्शक राहुल सदाशिवन यांचा 'ब्रह्मयुगम' हा चित्रपट. सुमारे 25 कोटी रुपयांच्या बजेटमध्ये तयार झालेल्या या ब्लॅक अँड व्हाईट हॉरर चित्रपटाने जगभरात तब्बल 87 कोटी रुपयांची कमाई केली. या चित्रपटातील दमदार अभिनयासाठी अभिनेते मामूटी यांना 72 व्या राष्ट्रीय चित्रपट पुरस्कारांमध्ये 'सर्वोत्कृष्ट अभिनेता' हा सन्मान मिळाला.
तीन पात्रांभोवती फिरणारी प्रभावी कथा
'ब्रह्मयुगम'ची कथा 17व्या शतकातील केरळच्या पार्श्वभूमीवर उलगडते. लोकगायक थेवन (अर्जुन अशोकन) हा घनदाट जंगलातील एका प्राचीन वाड्यात पोहोचतो. तेथे त्याची भेट रहस्यमय आचारी (सिद्धार्थ भरतन) आणि त्या वाड्याचा मालक कोडुमोन पोटी (मामूटी) यांच्याशी होते. या तिन्ही पात्रांच्या माध्यमातून सत्ता, जातिव्यवस्था, भीती आणि मानसिक संघर्ष यांसारख्या विषयांचा वेध घेण्यात आला आहे. विशेष म्हणजे संपूर्ण चित्रपट एकाच लोकेशनवर चित्रित करण्यात आला असून कोणतीही अनावश्यक उपकथा किंवा अतिरिक्त पात्रे यात नाहीत.
ब्लॅक अँड व्हाईट सादरीकरणाची वेगळी ताकद
या चित्रपटाचं सर्वात वेगळं वैशिष्ट्य म्हणजे त्याचं पूर्णपणे ब्लॅक अँड व्हाईट चित्रीकरण. दिग्दर्शक राहुल सदाशिवन यांनी जाणीवपूर्वक रंगांचा वापर टाळत 17व्या शतकातील वातावरण अधिक गडद आणि प्रभावी बनवलं आहे. कॅमेऱ्याची मांडणी, पार्श्वसंगीत आणि प्रोडक्शन डिझाइनमुळे चित्रपटातील तणाव आणि भय अधिक तीव्रपणे जाणवतो. त्यामुळे 'ब्रह्मयुगम'ला सायकोलॉजिकल हॉरर आणि फोक हॉरर या दोन्ही प्रकारांत समीक्षकांची विशेष दाद मिळाली.
मामूटींच्या अभिनयाला राष्ट्रीय स्तरावर गौरव
72 व्या राष्ट्रीय चित्रपट पुरस्कारांमध्ये 'ब्रह्मयुगम'ने दोन महत्त्वाचे पुरस्कार पटकावले. मामूटी यांना 'सर्वोत्कृष्ट अभिनेता' पुरस्कार मिळाला, तर शहनद जलाल यांना 'सर्वोत्कृष्ट सिनेमॅटोग्राफी'चा राष्ट्रीय पुरस्कार जाहीर झाला. 74 वर्षीय मामूटी यांनी साकारलेली कोडुमोन पोटी ही व्यक्तिरेखा रहस्यमय, भयावह आणि प्रभावी ठरली. त्यांच्या हावभाव, संवादफेक आणि देहबोलीने संपूर्ण चित्रपटाला वेगळी उंची मिळाली. हा मामूटी यांच्या कारकिर्दीतील चौथा राष्ट्रीय पुरस्कार आहे.
25 कोटींचं बजेट, 87 कोटींचा जागतिक गल्ला
'ब्रह्मयुगम' हा चित्रपट अंदाजे 25 ते 27 कोटी रुपयांच्या खर्चात तयार करण्यात आला. मल्याळम भाषेतील प्रदर्शनानंतर त्याचे हिंदी, तमिळ, तेलुगू आणि कन्नड डब व्हर्जनही प्रदर्शित करण्यात आले. देशांतर्गत तसेच परदेशातील बॉक्स ऑफिसवर या चित्रपटाला उत्स्फूर्त प्रतिसाद मिळाला आणि त्याने जागतिक स्तरावर सुमारे 87 कोटी रुपयांची कमाई केली. दमदार कथा आणि उत्कृष्ट अभिनयामुळे कमी बजेटमधील चित्रपटही मोठं यश मिळवू शकतो, हे या चित्रपटाने दाखवून दिले.
'ब्रह्मयुगम' कुठे पाहता येईल?
समीक्षकांनी 'ब्रह्मयुगम'ला "Masterclass in Cinematic Tension" अशी दाद दिली आहे. ज्यांनी हा चित्रपट अद्याप पाहिलेला नाही, त्यांच्यासाठी तो Sony LIV या OTT प्लॅटफॉर्मवर उपलब्ध आहे.
