अयातुल्ला अली खामेनेई यांच्या अंत्ययात्रेला प्रारंभ; तेहरानमध्ये हजारोंची उपस्थिती, अमेरिका-ट्रम्पविरोधी घोषणाबाजी

ग्रँड मोसल्ला येथे पार्थिवावर नागरिकांचे अखेरचे दर्शन; ९ जुलै रोजी मशहदमध्ये होणार अंतिम दफनविधी

इराणचे माजी सर्वोच्च नेते अयातुल्ला अली खामेनेई यांच्या अंत्ययात्रेला अधिकृतपणे सुरुवात झाली असून तेहरानमध्ये त्यांच्या अंत्यदर्शनासाठी नागरिकांनी मोठी गर्दी केली आहे. राजधानीतील ग्रँड मोसल्ला येथे त्यांचे पार्थिव ठेवण्यात आले असून देशाच्या विविध भागांतून लोक श्रद्धांजली अर्पण करण्यासाठी दाखल होत आहेत. या शोकसभेदरम्यान अमेरिकेविरोधात तसेच अमेरिकेचे माजी राष्ट्राध्यक्ष डोनाल्ड ट्रम्प यांच्याविरोधात घोषणाबाजी करण्यात आली.

तेहरानमधील ग्रँड मोसल्ला मशिदीत खामेनेई यांचे पार्थिव पारदर्शक काचेच्या शवपेटीत ठेवण्यात आले आहे. हजारो नागरिकांनी तेथे उपस्थित राहून त्यांना अखेरचा निरोप दिला. त्यांच्या पार्थिवावर काळी पगडी ठेवण्यात आली होती. शिया परंपरेनुसार ही पगडी पैगंबर मोहम्मद यांच्या वंशाशी असलेल्या नात्याचे प्रतीक मानली जाते.

४ जुलैपासून सुरू झालेली ही अंत्ययात्रा ९ जुलैपर्यंत इराणमधील विविध शहरांमधून नेली जाणार आहे. तेहरानसह अनेक ठिकाणी मोठ्या प्रमाणावर शोकसभांचे आयोजन करण्यात आले आहे. ४ जुलैपासून इराणमध्ये राजकीय शोकही जाहीर करण्यात आला असून, ९ जुलै रोजी मशहद येथे खामेनेई यांच्यावर अंतिम दफनविधी पार पडणार आहे.

अंत्यदर्शनासाठी जमलेल्या नागरिकांनी खामेनेई यांच्या समर्थनार्थ आणि अमेरिकेविरोधात घोषणाबाजी केली. "अमेरिका मुर्दाबाद" अशा घोषणा देण्यात आल्या. काही नागरिकांच्या हातात #KillTrump असे लिहिलेले फलकही दिसून आले. तसेच "खामेनेई यांच्या रक्ताचा बदला घेऊ" अशा घोषणाही या शोकसभेदरम्यान देण्यात आल्या.

अंत्ययात्रेला मोठ्या प्रमाणावर लोक उपस्थित राहत असल्याने संभाव्य सुरक्षेचा धोका लक्षात घेऊन इराण प्रशासनाने प्रमुख शहरांमध्ये अतिरिक्त सुरक्षा दल तैनात केले आहेत. देशातील वरिष्ठ नेत्यांच्या सुरक्षेतही वाढ करण्यात आली असून संपूर्ण अंत्ययात्रेदरम्यान कडक बंदोबस्त ठेवण्यात आला आहे.

दरम्यान, इराणचे सर्वोच्च नेते आणि अयातुल्ला अली खामेनेई यांचे सुपुत्र मोजतबा खामेनेई हे अंत्यसंस्कार सोहळ्याला उपस्थित राहणार नसल्याची माहिती समोर आली आहे. त्यांच्या सुरक्षेच्या कारणास्तव हा निर्णय घेण्यात आल्याचे सांगितले जात आहे.