परभणीतील जुना मोंढा भागातील घटना दोन अनोळखींवर गुन्हा दाखल
परभणी (Parbhani theft case) : स्कुटीच्या डिक्कीतून १ लाख ४० हजार रुपयांची रोकड लंपास करण्यात आल्याची घटना परभणी शहरातील जुना मोंढा भागात घडली. या प्रकरणी दोन अनोळखींवर नानलपेठ पोलीस ठाण्यात गुन्हा दाखल करण्यात आला आहे.अमीर खान यांनी तक्रार दिली आहे. फिर्यादी व त्यांचा मित्र वसमत रोडवरील एका बँकेत आले होते. या ठिकाणाहून त्यांनी धनादेशाद्वारे १ लाख ५० हजाराची रोकड काढली.
ही (Parbhani theft case) रोकड स्कुटीच्या डिक्कीमध्ये ठेवली. त्यानंतर संबंधित जुना मोंढा भागातील एका हॉटेलवर चहा पिण्यासाठी थांबले. चहा पिऊन झाल्यानंतर स्कुटी घेऊन अशोक नगर येथे पोहोचले. या ठिकाणी स्कुटीची डिक्की उघडली असता त्यांना डिक्कीमध्ये १ लाख ५० हजार रुपयांपैकी केवळ दहा हजार रुपये दिसले. उर्वरित १ लाख ४० हजाराची रोकड चोरीला गेल्याचे समजले. त्यानंतर फिर्यादी व त्यांचा मित्र पुन्हा जुना मोंढा भागात आले.
या ठिकाणी त्यांनी एका मोबाईल दुकानामधील सीसीटिव्ही कॅमेरा पाहिला असता एक अनोळखी इसम स्कुटीच्या डिक्कीतून रक्कम चोरी करत असताना दिसून आला. सदर व्यक्ती दुसर्‍या व्यक्तीसोबत दुचाकीवर बसून निघून गेला. या प्रकरणी दोन अनोळखींवर ३१ मे रोजी नानलपेठ पोलिसात गुन्हा नोंदविण्यात आला आहे.
