पूर्ण घटना सीसीटीव्हीत कैद; पोलिसांच्या कारवाईवर प्रश्नचिन्ह, नागरिकांमध्ये भीतीचे वातावरण
परभणी () : शहरातील नानलपेट पोलीस ठाण्याच्या हद्दीत बुधवारी (दि. 29) सकाळी साडेआठच्या सुमारास दोन अज्ञात चोरट्यांनी मोटारसायकलवर येत ज्येष्ठ महिलेच्या गळ्यातील मंगळसूत्र हिसकावून पळ काढल्याची धक्कादायक घटना घडली. या (Parbhani mangalsutra stolen) घटनेमुळे परिसरात भीतीचे वातावरण पसरले आहे.
परभणी शहरातील त्रिमूर्ती नगर परिसरातील आनंद प्रोव्हिजनजवळ राहणाऱ्या एका ज्येष्ठ महिलेच्या गळ्यातील मंगळसूत्र दोन अज्ञात चोरट्यांनी हिसकावून नेल्याची घटना बुधवारी सकाळी घडली. मिळालेल्या माहितीनुसार, मोटारसायकलवर आलेल्या दोन चोरट्यांनी महिलेला गाठून क्षणार्धात मंगळसूत्र हिसकावले आणि घटनास्थळावरून पळ काढला.
घटनेनंतर परिसरातील नागरिकांनी तत्काळ धाव घेत चोरट्यांचा पाठलाग करण्याचा प्रयत्न केला, मात्र चोरटे पसार होण्यात यशस्वी झाले. विशेष म्हणजे, ही संपूर्ण घटना परिसरातील सीसीटीव्ही कॅमेऱ्यात कैद झाली असून, त्याच्या आधारे चोरट्यांचा शोध घेण्याचे आव्हान पोलिसांसमोर उभे ठाकले आहे.
घटनेची माहिती मिळताच संबंधित पोलीस ठाण्याचे अधिकारी व कर्मचारी यांनी घटनास्थळी भेट दिली. मात्र, या प्रकरणी अधिकृत माहिती देण्यास पोलिसांकडून टाळाटाळ होत असल्याचे समोर आले आहे. नानलपेट पोलीस ठाण्याच्या हद्दीत यापूर्वीही अशा (Parbhani mangalsutra stolen) प्रकारच्या घटना घडल्याने नागरिकांमध्ये संताप व्यक्त होत आहे. वारंवार घडणाऱ्या चोऱ्या आणि हिसकावण्याच्या घटनांमुळे पोलिसांचा वचक राहिला आहे की नाही, असा प्रश्न उपस्थित केला जात आहे. शहरातील नागरिकांच्या सुरक्षेचा प्रश्न ऐरणीवर आला असून, पोलिसांनी या प्रकारांवर तातडीने अंकुश ठेवण्याची मागणी होत आहे.
