१ लाख ५० हजार ५०० रुपयांचा मुद्देमाल जप्त
आखाडा बाळापूर (Malrana Gambling Raid) : आखाडा बाळापूर पोलिस ठाण्याच्या हद्दीतील वारंगाफाटा बिट अंतर्गत मौजे भोसी येथील माळरानावर सुरू असलेल्या जुगार अड्ड्यावर पोलिसांनी रविवारी सायंकाळी छापा टाकला. पोलिसांना पाहताच तिघे जण पळून गेले तर पाच जणांना ताब्यात घेण्यात आले. या प्रकरणी रात्री उशिरा आठ जणांविरुद्ध गुन्हा दाखल करून एकूण १ लाख ५० हजार ५० रुपयांचा मुद्देमाल जप्त करण्यात आला.
पोलिस अधीक्षक डॉ. श्रेनिक लोढा आणि पोलिस निरीक्षक शरद मरे यांच्या मार्गदर्शना खाली सहाय्यक पोलिस निरीक्षक ज्ञानेश्वर बसवंते, संतोष नागरगोजे, प्रशांत शिंदे, पिराजी बेले, अरविंद जाधव, विठ्ठल जाधव आणि परमेश्वर सरकटे यांच्या पथकाने भोसी शिवारातील माळावर ही कारवाई केली. छाप्यादरम्यान धम्माजी विठ्ठल भालेराव रा. उमरी ता. अर्धापूर जि. नांदेड, बाळू रामराव पवार रा. झुनझुनवाडी ता. कळमनुरी, शिवाजी माधवराव मुटकुळे रा. सुकळी विर ता. कळमनुरी, विश्वास अंबादास राजगोरे रा. गिरगाव ता. वसमत आणि रंगराव शिवाजी राठोड रा. झुनझुनवाडी ता. कळमनुरी या पाच जणांना ताब्यात घेण्यात आले.
त्यांच्यासोबत असले इतर तीन जण पोलिसांना पाहून माळावरून पळून गेले. पोलिस जमादार संतोष नागरगोजे यांच्या फिर्यादीवरून नमूद तारीख वेळी व ठिकाणी आरोपी गोलाकार बसून पैसे लावून झन्नामन्ना नावाचा जुगार खेळत असल्याचे आढळून आले. त्यांच्याकडून रोख रक्कम, दोन दुचाकी आणि मोबाईल असा एकूण १ लाख ५० हजार ५० रुपयांचा मुद्देमाल जप्त करण्यात आला आहे, अशी माहिती सहाय्यक पोलिस निरीक्षक ज्ञानेश्वर बसवंते यांनी दिली. पोलिस पथकाने भोसी शिवारातील माळावर जुगार अड्ड्यावर छापा टाकताच जुगार खेळणारे पळू लागले. पोलिसांनी त्यांचा माळावरून पाठलाग करून पाच जणांना ताब्यात घेतले तर तिघे अंधाराचा फायदा घेऊन फरार झाले.
